زانیارییەک گەیشتووە بەکەناڵ8 کە وەزارەتی دارایی و ئابووری خەریکی کۆکردنەوەی داهاتی نانەوتییە بۆ دابینکردنی مووچەی مانگی 7ـی مامۆستایانی گرێبەست و بەشێک لە فەرمانبەران. ئەم دواکەوتنە پەیوەستە بە ڕێژەی کۆبوونەوەی پارە لە پارێزگاکان، بۆیە تاوەکو ئێستا هیچ کاتێکی فەرمی بۆ دابەشکردنی مووچە دیاری نەکراوە. تەنیا کاتێک خشتەکە ڕادەگەیەنرێت کە داهاتی پێویست لە گەنجینەکاندا بەردەست بێت.

تیمی تەکنیکی وەزارەتی دارایی هەرێم بە فەرمی لیستی مووچەی مانگی 8 و تەرازووی پێداچوونەوەی مانگی 7ی ڕادەستی بەغداد کردووە. ئەم هەنگاوە بۆ ڕێگریکردنە لە دواکەوتنی مووچە و یەکلاکردنەوەی وردبینی خەرجی و داهاتەکانە لەگەڵ حکومەتی فیدراڵ. ئێستا چاوەڕوان دەکرێت دوای وردبینیکردنی لیستەکان لە لایەن فەرمانگەی ژمێریاریی عێراقەوە، پڕۆسەی ناردنی پارە بۆ مووچەخۆران دەستپێبکات.

زانیارییەک گەیشتووە بە کەناڵ8 کە جیاوازییە داراییەکانی نێوان هەرێم و بەغداد لە سێکتەرە جیاوازەکاندا گەیشتووەتە ئاستێکی بەرچاو، بە جۆرێک مووچەی سەربازێکی عێراقی دەگاتە 1,200,000 دینار لە کاتێکدا پێشمەرگەیەک نزیکەی 500,000 دینار وەردەگرێت. ئەم نایەکسانییە تەنیا کەرتی سەربازی ناگرێتەوە، بەڵکو خاوەن پێداویستییە تایبەتەکان و کەسوکاری شەهیدانیش لە بەغداد شایستەی دارایی زۆر زیاتریان هەیە. ئێستا هەوڵەکان چڕکراونەتەوە بۆ ئەوەی لە بودجەی 2027ـدا پلەبەندیی مووچە لە سەرتاسەری وڵات یەکبخرێتەوە.

حکومەتی عێراق بۆ خۆپارێزی لە ناجێگیریی بازاڕی وزە، نرخی نەوتی لە بودجەی 2027دا بە کەمتر لە نرخە ڕاستەقینەکان خەمڵاندووە. ئەم هەنگاوە بەهۆی مەترسییەکانی سەر ڕێگا بازرگانییەکان و گەرووی هوورمزە کە ڕاستەوخۆ کاریگەرییان لەسەر قەبارەی هەناردەی نەوتی عێراق هەیە. ڕاوێژکارانی سەرۆکوەزیران پێیان وایە ئەم بودجەیە بەهۆی بارودۆخی ناوچەکە یەکێک دەبێت لە ئاڵۆزترین پڕۆژەیاساکان لە مێژووی وڵاتدا.

زانیارییەک گەیشووە بە کەناڵ8 ئاشکرای دەکات کە سەرەڕای قەدەغەکردنی فەرمی، بازاڕی نایاسایی فۆرێکس و دراوە ئەلیکترۆنییەکان لە عێراق و هەرێمی کوردستان بەشێوەیەکی بەرفراوان گەشەی کردووە، ئەمەش بووەتە هۆی ئەوەی ڕۆژانە بە ملیۆنان دۆلاری هاووڵاتییان لە ڕێگەی ئەپڵیکەیشنە نادیارەکان و نێوەندگیرە نایاساییەکانەوە لەدەست بچێت و ببێت بە هەوا.

بازاڕی دراوە ئەلیکترۆنییەکان وەرچەرخانێکی گەورەی بەخۆوە بینیوە؛ بە جۆرێک بەهای یەک بیتکۆین لە ماوەی دوو ڕۆژدا لە 64 هەزار دۆلارەوە بۆ سەروو 77 هەزار دۆلار بەرزبووەتەوە، ئەمەش دوای لێدوانە گەشبینەکانی دۆناڵد ترەمپ دێت سەبارەت بە ئایندەی کریپتۆ لە ئەمریکا.