بەپێی بەدواداچوونەکانی کەناڵ8، وەزارەتی دارایی عێراق بەڵێنی داوە ساڵی داهاتوو پاداشتی 12 مووچەی خانەنشینی بۆ نزیکەی 50 هەزار خانەنشینی هەرێمی کوردستان خەرج بکات، کە بەهۆی نەبوونی یاسای بودجەوە تاوەکو ئێستا دواکەوتووە و بۆ ئەم مەبەستەش سەرجەم داتا و زانیارییە پێویستەکان ڕادەستی بەغدا کراون.

وەزارەتی دارایی و ئابووریی هەرێمی کوردستان هۆشداریی بەپەلە دەداتە سەرجەم مووچەخۆران و ڕایدەگەیەنێت، کۆتایی مانگی ئاب دوایین وادەیە بۆ خۆتۆمارکردن لە پڕۆژەی "هەژماری من"؛ بەپێی ڕێککەوتنی نێوان هەولێر و بەغداش، هەر کەسێک تا ئەو بەروارە کارتی بانکیی وەرنەگرتبێتەوە، مووچەکەی لەلایەن حکومەتی فیدراڵییەوە ڕادەگیرێت.

بانکی ناوەندیی عێراق دڵنیایی دەداتە بازاڕ و هاونیشتمانییان کە بەهای دینار سەقامگیرە و هیچ بڕیارێک بۆ دەستکاریکردنی نرخی فەرمیی ئاڵوگۆڕ لە ئارادا نییە.

لەگەڵ دەنگۆی گۆڕینی بەهای فەرمیی دراو و ئاڵوگۆڕی پۆستە باڵاکانی بانکی ناوەندی، بەهای دینار بەرەو دابەزینی زیاتر دەچێت و 100 دۆلار 159 هەزار دیناری تێپەڕاند.

بەهای دیناری عێراقی بەرامبەر بە دۆلاری ئەمریکی لە بازاڕەکانی ئاڵوگۆڕی دراو لە هەرێمی کوردستان دابەزینی نوێی تۆمار کرد و نرخی 100 دۆلار گەیشتە 157 هەزار و 250 دینار. گوتەبێژی بازاڕی دراوی هەولێر و مامەڵەکارانی سلێمانی هۆکاری ئەم ناسەقامگیرییە بۆ دەنگۆی گۆڕینی بەهای دراوەکە، ناجێگیریی دۆخی دارایی و پرسی گۆڕانکاریی لە پۆستی پارێزگاری بانکی ناوەندی دەگەڕێننەوە.

وەزارەتی دارایی و ئابووریی حکومەتی فیدراڵ گشتاندنێکی فەرمی ئاراستەی سەرجەم وەزارەت و دامەزراوەکانی دەوڵەت کردووە بۆ دەستپێکردنی ڕێکارەکانی پێدانی سەرەمووچەی ساڵانە و پلەبەرزکردنەوەی فەرمانبەران. ئەمە لەکاتێکدایە لە هەرێمی کوردستان لە ساڵی 2025ـەوە سەرەمووچە و لە ساڵی 2016ـەوە پلەبەرزکردنەوەی فەرمانبەرانی شارستانی ڕاگیراوە، بەرپرسێکی وەزارەتی دارایی هەرێمیش ڕادەگەیەنێت کە دۆسیەکانیان بۆ جێگیرکردنی لە بودجەی 2027 ئامادە کردووە.