ناردنی لیستی مووچەی مانگی ئەیلوول دەکەوێتە هەفتەی داهاتوو
پووختەی هەواڵەکە:
- ڕەوانەکردنی لیستی مووچەی مانگی ئەیلوول بۆ بەغداد دواخرا بۆ هەفتەی داهاتوو.
- دارایی هەرێمی کوردستان پشووە فەرمییەکانی عێراق بە هۆکاری دواکەوتنەکە دەزانێت.
- لیستی مووچە بە سیستمی پەیڕۆڵ لە 16ـی ئەیلوولەوە لە گەنجینەکان تەواو کراوە.
- دارایی عێراق لە 23ـی مانگەوە دەستی بە دابەشکردنی مووچەی فەرمانبەرانی کردووە.
وەزارەتی دارایی و ئابووریی هەرێمی کوردستان ناردنی لیستی مووچەی مانگی ئەیلوولی بۆ بەغداد دواخستووە بۆ هەفتەی داهاتوو، لە کاتێکدا زیاتر لە دوو هەفتەیە وردبینیی لیستەکە بە سیستمی پەیڕۆڵ لە سەرجەم گەنجینەکان تەواو بووە و پشووەکانی کۆتایی ئەم هەفتەیە بووەتە هۆی دواکەوتنی پرۆسەکە.
ڕوونکردنەوەی وەزارەتی دارایی هەرێم لەسەر لیستی مووچە:
- لیستی مووچەی سەرجەم پارێزگاکان بە سیستمی پەیڕۆڵ ئامادەکراوە و لە 16ـی ئەم مانگەوە گەیشتووەتە وەزارەت.
- پشووی فەرمیی ڕۆژانی چوارشەممە و پێنجشەممە لە عێراق هۆکاری سەرەکیی نەناردنی لیستەکەیە لەم هەفتەیەدا.
- ڕەوانەکردنی تەواوی داتاکان دەکەوێتە سەرەتای هەفتەی داهاتوو لە دوای دەستپێکردنەوەی دەوامی فەرمیی فەرمانگەکان لە بەغداد.
- هیچ ئاستەنگێکی تەکنیکی لە ئامادەکردنی زانیاری و ژمارەی مووچەخۆرانی هەرێمی کوردستاندا نییە.
دابەشکردنی مووچە لە عێراق و کاتی وردبینی:
لە بەرامبەردا، وەزارەتی دارایی فیدراڵ لە بەغداد لە 23ـی ئەیلوولەوە دابەشکردنی مووچەی فەرمانبەرانی لە پارێزگاکانی عێراق دەستپێکردووە و زۆربەی دامەزراوەکان شایستەکانیان وەرگرتووە؛ بەپێی خشتەی دارایی عێراق، چاوەڕوان دەکرێت لە سەرەتای هەفتەی داهاتوودا دابەشکردنی مووچە لە ناوەند و باشوور تەواو بێت، ئەمەش هاوکات دەبێت لەگەڵ گەیشتنی لیستی هەرێمی کوردستان بۆ دەستپێکردنی پڕۆسەی وردبینی.
پێشینە و کاتی ئاسایی ناردنی لیستەکان:
لە مانگەکانی ڕابردوودا وەزارەتی دارایی هەرێمی کوردستان لە نێوان 17 بۆ 22ـی هەموو مانگێکدا لیستی مووچەی ڕەوانەی بەغداد دەکرد و شاندی تەکنیکی دۆسیەکەیان دەگەیاندە لایەنی فیدراڵ؛ پاشان لە ماوەی 48 کاتژمێردا وردبینی لە بەغداد تەواو دەکرا و شایستە داراییەکان خەرج دەکران، بەڵام ئەم مانگە سەرەڕای ئامادەبوونی پێشوەختەی لیستەکان، ناردنی داتاکان بۆ هەفتەی یەکەمی مانگی تشرینی یەکەم دواکەوت.
زانیاریی زیاتر بۆ تۆ:
لە ناوەڕاستی ئەم هەفتەیەدا لیستی مووچەی ئەیلوول دەچێتە بەغداد
46 خولەک پێش ئێستا