ئەمڕۆ لە شاری هەولێر، دیداری وەبەرهێنان لەنێوان هەرێمی کوردستان و وڵاتی سعودیە بەڕێوەچوو. لە دیدارەکەدا سلێمان ئەلعسێری، کۆنسوڵی گشتیی سعودیە و محەممەد شوکری، سەرۆکی دەستەی وەبەرهێنانی هەرێمی کوردستان ئامادە بوون. محەممەد شوکری لە وتارێکدا ڕایگەیاند، ئابووریی سعودیە وەرچەرخانێکی مێژوویی بۆ هەمەجۆرکردنی داهات بەخۆیەوە دەبینێت و دیدی وەبەرهێنانی کوردستانیش هاوشێوەی دیدی سعودییەیە.

هەماهەنگی لە کەرتە جیاوازەکان و کارئاسانییەکان

سەرۆکی دەستەی وەبەرهێنان ئاماژەی بەوە کرد، حکومەتی هەرێم هەنگاوی جیددی ناوە بۆ ئەوەی پشتبەستن تەنیا بە کەرتی وزە نەمێنێت. ڕوونیشیکردەوە کە دەستەی وەبەرهێنان ئامادەیە بۆ هاوبەشیکردن لەگەڵ سعودیە لە کەرتەکانی کشتوکاڵ و پیشەسازی، لە ڕێگەی پێشکەشکردنی ئاسانکاری لە مۆڵەتی وەبەرهێنان، مەرجەکانی کارکردن و لێخۆشبوون لە باج. هاوکات کۆنسوڵی سعودیە داوای لە گەشتیارانی وڵاتەکەی کرد سەردانی هەرێمی کوردستان بکەن.

ئاماری پڕۆژە وەبەرهێنانییەکان لە ساڵی 2025

محەممەد شوکری ئاشکرای کرد، ئاستی وەبەرهێنان لە 5 ساڵی ڕابردوودا بەرزبووەتەوە. تەنیا لە ساڵی 2025ـدا، مۆڵەت بە 210 پڕۆژەی وەبەرهێنان دراوە، کە کۆی سەرمایەی ئەو پڕۆژانە گەیشتووەتە زیاتر لە 4 ملیار دۆلار.

وەبەرهێنانی کۆمپانیا سعودییەکان لە سلێمانی

ئەم دیدارە دوای ئەوە دێت کە ڕۆژی ڕابردوو قوباد تاڵەبانی، جێگری سەرۆکوەزیرانی هەرێمی کوردستان لەگەڵ هەمان شاندی بازرگانی سعودیە لە سلێمانی کۆبووەوە. لەو کۆبوونەوەیەدا باس لە دەرفەتەکانی وەبەرهێنان لە سلێمانی کرا، بەتایبەت لە کەرتەکانی خانووبەرە، وزە، وزەی پاک، کارگێڕی و پیشەسازی. کۆمپانیا سعودییەکان ئامادەییان دەربڕیوە لە داهاتوویەکی نزیکدا پڕۆژەکانیان پێشکەش بکەن.

ڕەهەندی مێژوویی پەیوەندییەکان

کۆنسوڵی سعودیە لە کۆبوونەوەکەی سلێمانیدا جەختی لە ڕۆڵی مێژوویی جەلال تاڵەبانی کردەوە وەک ئەندازیاری دروستبوونی پەیوەندییەکانی ئێستای عێراق و هەرێمی کوردستان لەگەڵ سعودیە، ئەوەش دوای ئەوەی وەک یەکەم سەرۆککۆماری عێراق دوای ساڵی 2003 سەردانی ئەو وڵاتەی کرد. ئامانجی ئێستای ئیدارەی سلێمانیش ڕاکێشانی وەبەرهێنانی بیانی زیاترە بۆ گەشانەوەی کەرتی بازرگانی لە پارێزگاکەدا.