گوتەبێژى کۆمیسیۆنى هەڵبژاردنەکانى عێراق بە کەناڵ8ى راگەیاند "هیچ داواکارییەکمان بۆ دواخستنى هەڵبژاردن بەدەست نەگەیشتووە و دواخستنى هەڵبژاردن لەدەستى سەرۆکى هەرێمى کوردستاندایە".

جومانە غەلاى، گوتەبێژى کۆمیسیۆنى هەڵبژاردنەکانى عێراق بە کەناڵ8ى گوت "کۆمیسیۆنى هەڵبژاردنەکان بەردەوامە لە ئامادەکارییەکانى بۆ هەڵبژاردنى پەرلەمانى کوردستان".

گوتیشى "وەرگرتنى ناوى بەربژێر و لیستەکان کۆتاییهاتووە و رێگە بە تۆمارکردنى ناوى نوێ و کشانەوەى بەربژێر و هاوپەیمانییەکان نادرێت".

جومانە غەلاى روونیکردەوە "حەوتى نیسان تیروپشک بۆ پێدانى ژمارە بە بەربژێر و هاوپەیمانییەکان دەکەین و ژمارەى لیست و بەربژێرەکان لە ژمارە 101ەوە دەستپێدەکات".

گوتیشى "173 ناوەندى تۆمارکردنى کارتى دەنگدانمان کردووەتەوە" داواشى لە دەنگدەران کرد بچن کارتەکانیان وەربگرنەوە".

جەختیشیکردەوە، هیچ داواکارییەکیان بۆ دواخستنى هەڵبژاردن بەدەست نەگەیشتووە و "دواخستنى هەڵبژاردن لەدەستى سەرۆکى هەرێمى کوردستاندایە".