لە ماوەی ساڵانی رابردوودا ژیریی دەستکرد پێشکەوتنێکی بەرچاوی بەخۆیەوە بینیوە، بەکارهێنانێکی گشتگیر و بەربڵاوی لە سەرجەم بوارە جیاوازەکاندا هەیە. ژیریی دەستکرد-AI  تۆڕێکی بەرفراوانی داتا و زانیارییە کە دەتوانێت سەربەخۆیانە تێکست بەرهەمبهێنێت، وەڵامی پرسیار بداتەوە، دەستکاری وێنە بکات و چەندین فرمانی تایبەتمەند و ناوازەی دیکە ئەنجامبدات.

بێگومان بەردەستبوونی ئەم سیستەمە نوێیە، گۆڕانکارییەکی بەرچاوی لە بواری پزیشکیدا هێناوەتەئاراوە. لە بواری کردەییدا هاوکارییەکی بەرچاوی پزیشکانی کردووە تاوەکو بتوانن بە شێوازێکی باشتر دەستنیشانی نەخۆشییەکان بکەن و گونجاوترین چارەسەر دابینبکەن. لەلایەکی دیکەوە، سیستمە رۆبۆتییەکانی نەشتەرگەری بە ژیریی دەستکردەوە بەستراون، کە هاوکاریی نەشتەرگەر و پزیشکان دەکەن تاوەکو بە باشترین رێگە نەشتەرگەری ئەنجامبدەن. بەکارهێنانەکانی ژیریی دەستکرد لە بواری تەندروستیدا زۆرن، لێرەدا کۆمەڵێک لە بەکارهێنانە بەهادار و بەرچاوەکانی ئەم سیستمە خراونەتەڕوو.

• پێشنیارکردنی دەرمان: ژیریی دەستکرد دەتوانێت پلانێکی تایبەتمەند بۆ چارەسەرکردنی نەخۆش بەردەستبخات، ئەمەش بەگوێرەی بارودۆخی نەخۆشەکە و ئەو حاڵەتانەی لە ماوەکانی رابردووی ژیانیدا تووشیبووە. تەنانەت بەرنامەی خۆراکیی کەسەکە و شێوازی ژیانیشی لە هەڵبژاردنی شێوازی چارەسەردا رەچاو دەکات.
• پێشبینیکردنی نەخۆشی: سیستمەکە بە پشتبەستن بە زانیارییەکانی نەخۆشەکە و هۆکارە بۆماوەیی و ژینگەییەکان، دەتوانێت پێشبینی بکات کە ئایا کەسێک لە داهاتوودا ئەگەری تووشبوونی بە چ نەخۆشییەک هەیە.
• شیکردنەوەی پشکنینە کلینیکییەکان و دەستنیشانکردنی نەخۆشی: سیستمی ژیریی دەستکرد توانای هەڵسەنگاندن و بڕیاردانی لەبارەی کۆمەڵێک پشکنینی جۆراوجۆرەوە هەیە، لەوانەش سیتی سکان، تیشکی ئێکس، ئێم ئاڕ ئای و ژمارەیەک پشکنینی دیکە. هاوکات لە پاش هەڵسەنگاندن پشکنینەکان، دەتوانێت دەستنیشانی نەخۆشیش بکات، بۆنموونە لەڕێگەی پشکنینی تیشکی ئێکس و سیتی سکانەوە، سیستمەکە دەتوانێت نەخۆشییە شێرپەنجەییەکان دەستنیشانبکات.
• پیشەسازیی دەرمان: لە رۆژگاری ئەمڕۆدا بەشی زۆری کۆمپانیاکانی بەرهەمهێنەری دەرمان پشت بە سیستمی ژیریی دەستکرد دەبەستن، چونکە سیستمەکە دەتوانێت ماددەی کیمیایی نوێ و بێهاوتا دروستبکات کە دەشێت وەک دەرمانێک تاقیبکرێنەوە. ئەم رێبازە ئاستی خەرجیی کۆمپانیاکانی بە ئەندازەیەکی بەرچاو کەمکردووەتەوە.
• نەشتەرگەری: نەخۆشخانە پێشکەوتووەکان رۆبۆت و ژیریی دەستکردیان ئاوێتەی یەکدی کردووە بە مەبەستی ئەنجامدانی نەشتەرگەرییەکی پێشکەوتوو و ورد کە کەمترین زیان بە چارەخوازەکە بگەیەنێت. نەشتەرگەرەکان دەتوانن لەڕێگەی کۆمپیوتەری تایبەتمەندەوە سیستمە رۆبۆتییەکان کۆنترۆڵبکەن و لەو رێگەیەوە نەشتەرگەرییەکی بێهەڵە ئەنجامبدەن.