کاتێک پێوانەی لێدانی دڵمان دەکەین، لە بازندەی دەستمان هەست بە لێدانی خوێنبەرەکە دەکەین. لەباری ئاساییدا پێویست ناکات رێژەی لێدانی دڵمان بپێوین، چونکە ئەگەر ناڕێکییەکی گرنگە هەبێت هەستیپێدەکەین.

لەباری ئاساییدا و کاتی حەسانەوە لە کەسێکی پێگەیشتوودا، رێژەی لێدانی دڵ جێگیر نییە و بەگشتی لەنێوان 60 بۆ 100 لێدان لە خولەکێکدایە. هەندێ جار ئەگەر کەمتریش بێت ئاساییە، بەتایبەتی کاتی حەسانەوەی زۆر.

هۆکارەکانی کەملێدان و خێرالێدانی دڵ زۆرن. سەرەکیترین هۆکارەکانی خێرالێدانی دڵ ئەمانەن:

• دڵەڕاوکێ
• تا
• تووڕەبوون
• ترس و شەرم
• دەرمانەکانی رەبۆ
• ماندووبوونی جەستە
• غوددەی فرەچالاک
• تێکچوونی کارەبایی دڵ
• هەندێک نەخۆشیی دڵ
• ژەهراویبوون
• دووگیانی
• هەندێک دەرمانی بەرزەفشاری خوێن
• قەڵەوی و کێشزیادی
• نەخۆشیی رژێنی سەرگورچیلە
• تێکچوونی رێژەی پۆتاسیۆم و کالسیۆم لە خوێندا

سەرەکیترین هۆکارەکانی کەملێدانی دڵ ئەمانەن:

• خەوتن
• غوددەی کەمچالاک
• نەخۆشیی کارەبایی دڵ
• ژەهراویبوون
• هەندێک جۆری دەرمان وەکو ئیندراڵ و کۆنکۆر
• وەرزشوانی
• کەمیی رێژەی کالسیۆم

لێدانی دڵ تەنیا بە هەستکردن بە بازندەی دەست ناپێورێت، بەڵکو بە ئامێری ئۆکسجینپێو و ئامێری پێوانەکردنی فشاری خوێنیش دەپێورێت. لەکۆتاییدا دەڵێم تکایە ترپەی دڵتان زووزوو مەپێون!

د. یوسف خەتی، پسپۆڕی نەخۆشییەکانی هەناو