لە وەرزی زستاندا کاتێک پلەی گەرما بۆ خوار سفر دادەبەزێت، ئەگەری نەخۆشیی سەرمابردن و تەزین دروستدەبێت، لەم نەخۆشییەدا بەشە دەرکەوتووەکانی لەشی مرۆڤ وەک پەنجەی دەست و قاچ، لووت و گوێچکە، دەیبەستیت و چیدیکە خوێن پێیدا هاتوچۆ ناکات.

نەخۆشەکە هەست بە مێروولەکردن و سڕبوون دەکات، دواتر رەنگی پێستی سووردەبێتەوە و هەڵدەئاوسێت، ئەگەر فریای خۆی نەکەوێت، رەنگی شین و رەش دەبێتەوە و ئاوسانەکەی زیاتر دەبێت و هەست بە ئازار دەکات.

ئەم جۆرە نەخۆشییە زیاتر لەو کەسانەدا دەردەکەویت کە لە کاتی سەرمادا لە دەرەوەی ماڵەوەن، وەک سەرباز و شاخەوان و کەسانی بێ ماڵ و حاڵ و سەرخۆش.

ئەگەر بەرکەوتووەکە زوو فریای خۆی نەکەوێت، نەخۆشییەکەی توندتر دەبێت و مەترسی لەسەر ژیانی دروستدەکات. گرنگترین ماکی ئەم نەخۆشییە دابەزینی پلەی گەرمی جەستەی نەخۆشەکە و هەڵئاوسانی بەشە بەرکەوتووەکەی جەستەیەتی

شێوازی خۆپاراستن

• - لە زستاندا جلوبەرگی گەرم لەبەربکەی.
• - ئەگەر لە زستاندا چوویتە دەرەوەی ماڵ دەبی خواردن و شلەمەنی باش بخۆیت
• - لە شوێنی کاردا بجوڵێیت و نەوەستیت
• - ئەو کەسانەی نەخۆشیی شەکرەیان هەیە یان جگەرەکێشن، نابێت خۆیان بەر سەرما بدەن

چارەسەر چییە؟

• بە گەرمکردنەوەی سەرتاپای جەستەی نەخۆشەکە دەستپیدەکات
• داپۆشینی بە بەتانی و لێفە
• پیدانی شلەمەنیی گەرم
• ناردنی بۆ نەخۆشخانە بۆ ئەوەی چارەسەری نەخۆشییەکەی تەواوبکات

د. فایەق محەمەد گوڵپی، پسپۆڕی نەشتەرگەریی گشتی