ئەم حاڵەتە بریتیەلە هەوکردنێکی لەناکاوی بنکەی ئەو مووانەی دەکەونە ناو کوونی لووتەوە بەهۆی جۆرێک لە بەکتریا کە ناسراوە بە (ستافیلۆکۆکەس) .

ئەم هەوکردنە بەکتریاییە کاتێک روودەدات کە داڵانی لووت برینداردەبێت بەهۆی :-

• هەڵکێشانی مووی لووت
• پاکردنەوەی لووت بە فشاری زۆر
• کوونکردنی لووت بۆ مەبەستی جوانکاری
• گیربوونی تەنێک لەناو لووتدا کە بەزۆری لە منداڵاندا باوە
• هەندێک هۆکاری دیکە هەن وەک:- تامێسک، نەخۆشیی شەکرە، لاوازیی بەرگریی لەش

نیشانەکان :

• سووربوونەوە و ئاوسان لە ناوەوە و دەرەوەی کونەلووت
• دروستبوونی بڵقی شێوە زیپکە لەناو کونەلووت
• هەستکردن بە رەقبوون و ئازار لەناو لووت
• هەڵئاوسان و سووربوونەوەی پەڕەکانی لووت و سەری لووت
• وشکبوونەوە و هەندێکجار خوێنبەربوون
• دروستبوونی دومەڵی بچووک کە کێمیان تێدایە لەناو کونەلووت

چارەسەری حاڵەتە پشت دەبەستێت بە زۆر و کەمی هەوکردنەکە، پزیشکی پسپۆڕ دەرمان و چارەسەری پێویست دیاریدەکات .

ئەگەر ئەم حاڵەتە بەردەوام بوو یاخود چەندینجار دووبارە بۆوە پێویستە سەردانی پزیشکی پسپۆڕ بکرێت بۆ دڵنیابوونەوە لە بوونی حاڵەتی مەترسیداری وەک شێرپەنجە .

د. دیلان عارف عەلی

پسپۆڕی نەشتەرگەریی قورگ و لووت و گوێ