نەشتەرگەریی بڕینی گەدە (گاستریک سلیڤ) کاریگەریی گەورەی لەسەر توانای لەش بۆ رۆژووگرتن هەیە. لەبەر چەند هۆکارێک:

 قەبارەی گەدە بۆ %15 بۆ %20ـی قەبارە ئاساییەکەی کەمدەکرێتەوە، هەروەها پێویستییەکی زۆر بۆ خواردنەوەی شلەمەنی و شێداریی جەستە هەیە، هاوکات پێویستی بۆ جێگرتنەوەی کانزا و خوێ و ڤیتامینە لەدەستچووەکان زیاتر دەبێت، هەربۆیە زۆر گرنگە زانیاریی تەواو وەربگرن لەم مانگە پیرۆزەدا. بەشێوەیەکی گشتی نەخۆشەکان دەکەین بە چەند گروپێکەوە بەگوێرەی کاتی نەشتەرگەرییەکە و باری تەندروستیی کەسەکە:

1. یەکەم شەش مانگ دوای نەشتەرگەری: لەهیچ بارێکدا رێگە پێدراو نییە و نابێت بەڕۆژووبن
2. ئەو کەسانەی لەنێوان شەش مانگ بۆ ساڵێکدان دوای نەشتەرگەری: باشترە بەڕۆژوونەبن، بەڵام ئەگەر تەندروستییان باش بێت و گرفتی تەندروستییان نەبێت و پزیشکەکەیان رێگەیان پێبدات، بە مەرج رەنگە بتوانن بەڕۆژووبن، بەڵام دەبێت رەچاوی بەرنامەی تایبەت بکەن و بەردەوام لەگەڵ پزیشکەکەیان لەسەرهێڵ بن
3. ئەوانەی ساڵێک یان زیاتر بەسەر نەشتەرگەرییەکەیاندا تێپەڕیوە و گرفتی تەندروستییان نییە و ڤیتامین و ماددەکانیان کەم نییە: دەتوانن بەڕۆژووبن، ئەویش دوای راوێژ لەگەڵ پزیشکەکەیان
4. ئەوانەی ساڵێک یان زیاتر بەسەر نەشتەرگەرییەکەیاندا تێپەڕیوە، بەڵام گرفتی تەندروستییان هەیە یاخود ڤیتامین و ماددەکانیان کەمە: ناتوانن بەڕۆژووبن.

کێ نابێت رۆژوو بگرێت؟

• ئەو نەخۆشانەی لە یەکەم شەش مانگی دوای نەشتەرگەریدان بەهیچ جۆرێک رێگەپێدراو نییە.
• ئەوانەی کێشیان بەردەوامە لە دابەزین بە رێژەی (زیاتر لە 1-2 کیلۆگرام لە مانگێکدا)
• ئەوانەی رشانەوە یان گەرانەوەی ترشی گەدەی بەردەوامیان هەیە
•  نەخۆشانی کەمیی خۆراک و ڤیتامین و کانزاکانئاسن
• ئەوانەی دەرمانی تایبەت بەکاردەهێنن کە نابێت کاتەکانی بگۆڕرێت.
• ئەوانەی شەکرە یان نەخۆشیی درێژخایەنی دیکەیان هەیە.
•  ئەوانەی ناتوانن بڕی پێویست ئاو بخۆنەوە و رەچاوی پرۆگرامە خۆراکییەکان بکەن.

د. محەمەد بەرزنجی، پزیشکی پایەبڵندی نەشتەرگەریی گشتی