پارتی دەم خۆشحاڵیی خۆی بە راگەیاندنی ئاگربەست لەلایەن پەکەکەوە دەردەبڕێت و دەڵێت، پێویستە بە ئامانجی بەرەوپێشبردنی قۆناغی دیموکراسی، پەرلەمان بەرپرسیارێتیی خۆی دوای ئەم هەنگاوە هەڵبگرێت.

گوڵستان کلچ کۆچیغیت، بریکاری سەرۆکی فراکسیۆنی پارتی یەکسانی و دیموکراسیی گەلان (پارتی دەم) لە لێدوانێکدا بۆ هاڵک تی ڤی تورکی، ئاماژەی بە ئاگربەستەکەی پەکەکە و قۆناغی چارەسەری و دیموکراسیی تورکیا دا.

کۆچیغیت رایگەیاند، ئاگربەستەکەی پەکەکە نیشانەی ئەوەیە، کە پرۆسەکە بەشێوەیەکی خێرا بەرەو پراکتیزەکردن دەڕوات و ئەو هەنگاوەی پەکەکە مایەی خۆشحاڵییە.

باسی ئەوەشیکرد، پێویستە بۆ قۆناغی دەموکراسی، پەرلەمانی تورکیا دوای ئەم هەنگاوە بەرپرسیارێتیی بخاتە ئەستۆی خۆی.

ئەمڕۆ 1ـی ئازاری 2025، پەکەکە بەشێوەیەکی یەکلایەنە ئاگربەستی راگەیاند و بڕیاریداوە، ئەگەر هێرش نەکرێتە سەر هێزەکانیان، هیچ چالاکییەکی چەکداری ئەنجام نەدەن.

رۆژی 27ـی ئەم مانگە، عەبدوڵا ئۆجەلان، رێبەری زیندانیکراوی پارتی کرێکارانی کوردستان لە پەیامێکی نووسراودا داوای لە پەکەکە کرد، چەک دابنێت و لە کۆنگرەیەکیشدا هەڵوەشانەوەی خۆی رابگەیەنێت.