جیاواز لە زیادکردنى باجەکان، ئەمجارە دۆناڵد ترەمپ، دەستوەردان لە کاروباری دامەزراوەیەکى وڵاتەکەى دەکات، کە بەتەواویی سەربەخۆیە، ئەمەش وا لێکدەدرێتەوە لێکەوتەکانی شەڕی بازرگانی بۆ جیهان و ناوخۆی ئەمریکاش فراوانتر بکات.

دۆناڵد ترەمپ، سەرۆکی ئەمریکا، بۆ رەوینەوەی لێکەوتە خراپەکانی زیادکردنی باج لەسەر 185 وڵاتی جیهان داوای کەمکردنەوەی رێژەی سوودی بانکی لە جیرۆم پاوڵ، سەرۆکی بانکی فیدراڵی دەکات و لە بەرامبەردا سەرۆکی بانکەکە ناڕەزایەتی دەردەبڕێت بەوەی کەمکردنەوەی رێژەی سوود کێشەى ئابووری بۆ ئەمریکا دروستدەکات.

پێنج ساڵ لەمەوبەر پەتای کۆرۆنا گەشەی ئابووریی جیهانی خاوکردەوە و رێژەی هەڵاوسانی بەرزکردەوە، وڵاتان بەهەموو توانایانەوەوە لە هەوڵدابوون تاوەکو رێژەکان دابەزێنن و زاڵ بن بەسەر لێکەوتەکانیاندا، ئەمریکاش یەکێک لەو وڵاتانە بوو، رێژەی هەڵاوسان تیایدا بەخێرایی بەرزبووەوە لە 0.1%ـەوە گەیشتە 1.4% و لە بەرزترین ئاستیشدا پاش هەڵگیرسانی جەنگی رووسیا و ئۆکرانیا، گەیشتە %9.1، سەرەڕای هەوڵەکانیش، بەگوێرەی دوایین داتا رێژەی هەڵاوسان لە ئەمریکا گەڕاوەتەوە بۆ 2.4% و ئامانجی بانکی فیدراڵیی وڵاتەکەیە بیگەیەنێتە 2%، پاوڵیش نیگەرانە، کەمکردنەوەی رێژەی سوودی بانکی نەگاتە ئاستی دڵخوازیی خۆى و ریسەکەی لێ ببێتەوە بە خوری.

ترسى شارەزایانى ئابووریى ئەمریکا لەوەیە، دەستوەردانەکانى ترەمپ لە کاروبارەکانى بانکى فیدراڵی وڵاتەکە بگێڕێتەوە بۆ سەردەمی کۆرۆنا و سەرەتاکانى جەنگی رووسیا و ئۆکرانیا، تەنانەت ئەگەر بۆ ماوەیەکی کورتخایەنیش بێت، کە خەریکە لێکەوتەکانی ناکۆکیی نێوان ترەمپ و جیرۆم پاوڵ، ئەوەى لێدەکەوێتەوە.

بەجۆرێک، دایان سوۆنک، بەڕێوەبەرى دارایی لە کۆمپانیای 'کەی پی ئێم جی' و ستیفانی رۆت، بەڕێوەبەرى دارایی لە کۆمپانیای 'وۆڵف ریسێرچ' و بەشێکی زۆر لە ئابووریناسانى ئەمریکا لەسەر ئەوە کۆکن، پلانە گومرگییەکانی ئیدارەی ئەمریکا، دەبێتە هۆی بەرزبوونەوەی نرخەکان و گەشەی ئابووری خاوتردەکاتەوە.

دەشڵێن، ئەگەر سەرۆکی ئەمریکا دەستێوەردان لە کاروباری بانکی فیدراڵیی بکات، ئەوا ئەو سەربەخۆییە لەدەستدەدات کە زیاتر لە یەک سەدەیە بەدەستی هێناوە و ئەمەش کاریگەریی نەرێنی لەسەر متمانەی وڵاتەکە دروستدەکات.

جیرۆم پاوڵ، ماوەی یاسایی کارکردنی لە مانگی ئایاری 2026 کۆتایی دێت و ترەمپ رایگەیاندووە، رێگە نادات بە دووبارە دانانەوەی لە پۆستەکەیدا، لە بەرامبەردا پاوڵ دەڵێت، هیچ نیازێکی بۆ وازهێنان نییە و رژدە لەسەر ئەوەی بڕیاردان لە سیاسەتی بانکەکە، دەبێت بە یاسایی و شیکاریی ورد بێت.

ململانێی نێوان سەرۆکی بانکەکە و سەرۆکی وڵاتەکە نوێ نییە و لە خولی یەکەمی سەرۆکایەتی ترەمپدا هەر بەهەمان شێوە بووە، بەڵام هەرگیز نەگەیشتووەتە ئاستی ئێستا و ئەمەش کاریگەریی لەسەر بەهای دراو و پشکی بازاڕە داراییەکان دروستکردووە، سەرەڕای نادڵنیاییەکانی سیاسەتی باج و شەڕی بازرگانی.