وەزارەتی دەرەوەی ئێران رایگەیاند، لەئێستادا پەرلەمانی وڵاتەکەی سەرقاڵی ئامادەکردنی پرۆژە بڕیارێکە بۆ کشانەوە لە پەیماننامەى رێگری لە بڵاوبوونەوەى چەکی ئەتۆمی کە لە ساڵی 1970ـوە خراوەتە بواری جێبەجێکردنەوە و ئێرانیش واژۆی کردووە.

ئیسماعیل بەقائی، گوتەبێژی وەزارەتی دەرەوەی ئێران رایگەیاند، لەژێر رۆشنایی پەرەسەندنەکانی ئەمدواییەی جەنگ، بڕیاری پێویست دەدەن و پەرلەمانی وڵاتەکەیان سەرقاڵی ئامادەکردنی پرۆژە بڕیارێکە بۆ دەرچوون لە پەیماننامەى رێگرى لە بڵاوبوونەوەى چەکی ئەتۆمی.

گوتەبێژەکەی حکومەتی ئێران راشیگەیاند، لە قۆناغەکانی دواتری ئامادەکردنی پرۆژە بڕیارەکەدا هەماهەنگی لەگەڵ پەرلەمان دەکەن و کاتێکیش بڕیارەکە دەرچوو، ئەوان وەک حکومەت جێبەجێیدەکەن.

پەیماننامەى رێگرى لە بڵاوبوونەوەى چەکی ئەتۆمی، لە ساڵی 1970ـوە لەلایەن حکومەتی ئێرانەوە واژۆکراوە و تیایدا مافی وڵاتان بۆ بەدەستهێنانی وزەی ئەتۆمی بۆ پرۆژەی مەدەنییانە و ئاشتیخوازانە زامنکراوە، بەڵام رێگە بە بەرهەمهێنانی چەکی ئەتۆمی و هاوکاریکردنی وڵاتانی دیکەش نادات کە نیازی بەرهەمهێنانی چەکی ئەتۆمییان هەیە.