عێراق کێشەی هەناردەی کارگە بچووکەکانی هەرێمى كوردستان چارەسەر دەکات
وەزارەتی بازرگانیی عێراق رەزامەندی دەربڕیوە لەسەر ساغکردنەوەی بەرهەمی کارگە بچووکەکانی هەرێمی کوردستان لە بازاڕەکانی ناوەڕاست و خوارووی عێراق.
ئارام بابان، ئەندامی ژووری بازرگانیی سلێمانی بۆ کەناڵ8 ئەوەی خستەڕوو، هۆکاری وەستانی هەناردەی کارگە بچووکەکان بۆ عێراق ئەوە بووە، ئەو کارگانە لە ژووری بازرگانی رەزامەندی و مۆڵەتیان وەرگرتووە، بەڵام عێراق لەگەڵ وەزارەتدا مامەڵە دەکات نەوەک ژووری بازرگانی و ئەوەش دژی رێنماییەکانی عێراقە و لە ماوەی دوو ساڵی رابردوودا رێگربووە لە وەرگرتنی بەرهەمی کارگەکانی شیش و کارگە بچووکەکان لە عێراق.
ئاماژەی بەوەشکرد، سبەی شاندێکی وەزارەتی بازرگانیی عێراق دەگاتە سلێمانی و لەگەڵ ژووری بازرگانی کۆدەبێتەوە و پرۆتۆکۆلێک واژۆدەکەن بۆ چارەسەرکردنی گرفتى کارگە بچووکەکان، کە ژمارەیان سەدان کارگەیە.
ئەو ئەندامەی ژووری بازرگانی سلێمانى دەڵێت؛ ئەگەر رێگە لە شیش و خشت و بەرهەمی کارگە بچووکەکانی دیکە بگیرێت ئەوا کەمیی کەرەستە لە بازاڕەکانی عێراق دروستدەبێت.
05/07/2025