پرۆستات رژێنێکی بچوکە لە پیاواندا و بەشێکە لە کۆئەندامی زاوزێ، ئەم رژێنە بەرپرسە دروستکردنی ئەو شلەیەی پارێزگاری لە تۆو دەکات، وەکو هەر ئەندام و رژێنێکی دیکەی جەستە، پرۆستاتیش دەکرێت تووشی چەند گرفت و نەخۆشییەکی جیاواز ببێت.

لە بڵاوکراوەیەکدا، د. رەنج بیلال کاکەیی، پسپۆڕئ نەشتەرگەرییەکانی گورچیلە، میزەڕۆ و پرۆستات، باسی لە سێ باوترین نەخۆشییەکانی پرۆستات کردووە شێوازی ناسینەوەشیانی خستووەتەڕوو.

هەریەکێک لەو نەخۆشییانەی تووشی پرۆستات دەبن، چەند نیشانەیەکی جیاوازیان هەیە.

گەورەبوونی پرۆستات:

گەورەبوونی پرۆستات حاڵەتێکی باوی ناشێرپەنجەییە و لەگەڵ هەڵکشانی تەمەندا روودەدات.

باوترین نیشانەکانی گەورەبوونی پرۆستات ئەمانەن:

• میزکردنی زۆر بەتایبەتی لە شەواندا
• کەسەکە بە سەختی دەست بە میزکردن دەکات
• ناتەواوی بەتاڵبوونی میزڵدان
• میزکردنی بەپەلە

گەورەبوونی پرۆستات نابێتەهۆی تووشبوون بە نەخۆشیی شێرپەنجە، بەڵام دەکرێت کاریگەری لەسەر کوالێتیی ژیان هەبێت.

هەوکردنی پرۆستات:

ئەم هەوکردنە دەکرێت توند یان درێژخایەن بێت و چەند جۆرێکی هەیە:

هەوکردنی توندی بەکتریایی: نیشانەکان لەپڕ سەرهەڵدەدەن وەکو ئازار، لەرز، تا و ئازاری خوارەوەی پشت/حەوز.

هەوکردنی درێژخایەنی بەکتریایی: هۆکارێکی دووبارەبوونیەوەی هەوکردنی میزڵدانە.

شێرپەنجەی پرۆستات:

گرێیەکی شێرپەنجەییە لە رژێنی پرۆستاتدا و یەکێکە لە باوترین جۆرەکانی شێرپەنجە لە پیاواندا.

نیشانە سەرەتاییەکان دەکرێت هەر یەکێک لەمانە بن:

• گرفتی میزکردن
• هەبوونی خوێن لە میز یان تۆواودا
• ئازار لە بەشی خوارەوەی پشت یان ران
• تێکچوونی رەقبوونی چووک
• دابەزینی کێش بەبێ هەبوونی پلان (لە حاڵەتە پێشکەوتووەکاندا)

‌‌