وەزارەتى ناوخۆى عێراق دەرئەنجامى ئەو لیژنەى لێکۆڵینەوەیەى راگەیاند کە بە فەرمانى سەرۆکوەزیرانى عێراق بۆ لێکۆڵینەوە لە رووداوى ئاگرکەوتنەوەکەى پارێزگاى واست پێکهێنرابوو و 17بەڕێوەبەر و فەرمانبەر دەستیان پێ لەکارکێشراوەتەوە.

عەمید میقداد میرى، گوتەبێژى وەزارەتى ناوخۆى عێراق رایگەیاند، کەمتەرخەمیى ئاشکرا لەلایەن ژمارەیەک بەرپرس و فەرمانبەرى بەشێک لە فەرمانگەکانى پارێزگاکە هەبووە و بووەتە هۆى دروستبوونى ئەو رووداوە.

دەشڵێت، بە بڕیارى لیژنەکە، 17 بەڕێوەبەر و برپرسى بەش و فەرمانبەرى دامەزراوەکانى پارێزگاکە بەشێوەیەکى کاتیى دەستیان پێ لەکارکێشراوەتەوە و سێ بەرپرسی سەربازیی پارێزگاکە تاوەکو کۆتاییهاتنى لێکۆڵینەوەکان راگیراون.

گوتەبێژەکەى وەزارەتى ناوخۆ ئەوەشى راگەیاندووە، 610 پرۆژە لەسەرجەم پارێزگاکانى عێراق بەهۆى کەموکوڕى و نەبوونى مەرجى سەلامەتى داخراون.

وەزارەتى ناوخۆ جەختدەکاتەوە، لێکۆڵینەوە لەگەڵ هەموو ئەوانە دەکرێت کە کەمتەرخەم بوون، لیژنەکە بەردەوام دەبێت لەکارەکانى و دەرئەنجامى کۆتایی دەخاتەڕوو.