بافڵ جەلال تاڵەبانی، سەرۆکی یەکێتیی نیشتمانیی کوردستان، لە ساڵیادى جینۆسایدى بارزانییەکاندا سەرەڕاى ئەوەی سەرەخۆشى لە کەسوکارى قوربانییەکان، جەخت لە یەکڕیزى و یەکگوتارى دەکاتەوە.

بافڵ جەلال تاڵەبانی، لە پەیامەکەیدا دەڵێت "ئەنفالکردنی بارزانییەکان برینێکی سەر جەستەی نیشتمانە و بەڵگەی ئەو سیاسەتە دڕندانەیەی رژێمی بەعسی لەناوچووە کە لە تەواوی شاڵاوەکانی ئەنفالدا بۆ سڕینەوەی ناسنامە و قڕکردنی گەلەکەمان پەیڕەوی دەکرد".

دەشڵێت "لەم یادە پڕ لە ماتەمەدا سەری رێز و نەوازش بۆ گیانی پاکی سەرجەم شەهیدانی کوردستان و قوربانییانی ئەنفال دادەنەوێنین و هاوخەمیی قووڵی خۆمان ئاڕاستەی کەسوکارە سەر بەرزەکانیان دەکەین".

سەرۆکى یەکێتى، جەخت لەوە دەکاتەوە قەرەبووکردنەوەی کەسوکاری قوربانییانی شاڵاوی ئەنفال تەنیا ئەرکێکی یاسایی نییە، بەڵکو هەوڵێکی کرداری و جدیی حکومەتی عێراقە بۆ ساڕێژکردنی بەشێک لەم برینە گەورەیە.

لە کۆتایى پەیامەکەیدا دەڵێت "باشترین وەفاداری بۆ خوێنی پاکی شەهیدان، یەکڕیزی و یەکگوتاریی نیشتمانیمانە بۆ بەهێزترکردنی هەرێمی کوردستان".