هەوکردنی پەنکریاس نەخۆشییەکە دەکرێت کتوپڕ یان درێژخایەن بێت و باوترین نیشانەی نەخۆشییەکەش ئازاری سکە.

لە بڵاوکراوەیەکدا، د. سەرکەوت رەئوف، پزیشکی پسپۆڕی ورد لە نەخۆشییەکانی کۆئەندامی هەرس و جگەر و ناوبینی، باسی لە باوترین هۆکارەکانی هەوکردنی پەنکریاس کردووە و چارەسەرەکانیشی خستووەتەڕوو.

سەرەکیترین هۆکارەکانی هەوکردنی پەنکریاس بریتینلە:

• زۆر خواردنەوەی کحول
• زیادبوونی چەوریی سیانی
• گیرانی بۆریی زەرداو بەهۆی بەرد یان گرفتی بۆماوەییەوە کە پەیوەستە بە بەرگریی جەستە، یان زیادبوونی کالسیۆم و کەڵەکەبوونی پڕۆتینەوە.

نیشانە باوەکانی هەوکردنی پەنکریاس ئەمانەن:

• ئازاری بەردەوام، دووبارە و توندی سک
• لەدەستدانی کێشی جەستە (بەبێ گۆڕینی شێوازی ژیان) بەهۆی خراپیی هەڵمژینی بەها خۆراکییەکانەوە
• گۆڕانی پیسایی بۆ چەور و بۆن ناخۆش
• تووشبوون بە نەخۆشیی شەکرە

چارەسەرەکانی هەوکردنی پەنکریاس:

گرنگە پاش هەبوونی ئەم نیشانانە، چارەخواز بچێت بۆلای پزیشکێکی پسپۆڕی نەخۆشییەکانی کۆئەندامی هەرس. لە ئەگەری هەبوونی بەردی زراو، داخرانی رێڕەوی زراو و پەنکریاس، نەشتەرگەریی لابردنی بەرد و کردنەوەی رێڕەوەکە دەکرێت.

هاوکات وەرگرتنی دەرمان لەڕێگەی دەم یان خوێنهێنەرەوە، پەیڕەوکردنی سیستمێکی خۆراکیی کەمچەوری و خواردنەوەی شلەیەکی زۆر لەگەڵ ژەمی بچووک و بەردەوام، ئەگەر حاڵەتەکە بەهۆی دەرمانێکی دیاریکراوەوە دروستبووبێت، ئەوکات پێویستە دەرمانەکە لەژێر چاودێریی پزیشکدا بوەستێنرێت یان بگۆڕرێت.