تەیموور حسێنی، بەڕێوەبەری پۆلیسی رێگاوبانی ئێران، رایگەیاند، لە 19 رۆژی رابردوودا بەهۆی رووداوی هاتووچۆ، 149 زیارەتکاری ئێرانی بۆ بەشداری لە چلەی ئیمام حسێن گیانیان لەدەستداوە و سێ هەزارو 362 زیارەتکاری دیکە برینداربوون.

حسێنی، دەڵێت، ئامارەکانی گیانلەدەستدان بەراورد بە هەمان ماوەی ساڵی رابردوو، 19%کەمیکردووە.

بەڕێوەبەری پۆلیسی رێگاوبانی ئێران، دەشڵێت، ژمارەی ئەو کەسانەی لەو ماوەیەدا برینداربوون سێ هەزارو 362 کەس بوون بەراورد بە ساڵی رابردوو، 15% رێژەکە کەمیکردووە.

لە بارەی زیادبوونی رێژەی مردن بە گوێرەی پارێزگاکان، حسێنی باسی لەوەکرد، لە پارێزگای ورمێ و ئیلام رێژەکە زیادیکردووە، بە جۆرێک ورمێ بە 38 زیارەتکار، 27% لە ساڵی پار زیاترە و ئیلام بە 17 زیارەتکار 13%، بەراورد بە ساڵی پار رێژەکەی زیادیکردووە.

بەڕێوەبەری پۆلیسی رێگاوبانی ئێران، گۆڕینی لە ناکاوی ئاڕاستەى شەقامەکان، لە کۆنتڕۆڵ دەرچوونی ئۆتۆمبێل و بێئاگایی شۆفێران و نەشارەزاییان لە رێگاوبانەکان بە گرنگترین هۆکارەکانی رووداوی هاتووچۆی ئەو 19 رۆژە دانا.

پێشتریش ئەحمەد رەزا رادان، فەرماندەی گشتیی پۆلیسی ئێران، رایگەیاندبوو، لەماوەی دەستپێکردنی رێوڕەسمەکاندا، نزیکەی ملیۆنێک و 300 هەزار کەس گەڕاونەتەوە ئێران، داواشی لە خەڵکی وڵاتەکەی کرد، دەروازە سنوورییەکانی خوسرەوی، حاجی ئۆمەران و باشماخ بۆ هاتوچۆ بەکاربهێنن.

بە گوێرەی ئامارەکانی وڵاتەکەش تاوەکو ئەمڕۆ، زیاتر لە چوار ملیۆن زیارەتکاری ئێرانی هاتوونەتە عێراق بۆ بەشداری لە چلەی ئیمام حسێن.