لەیلا عومەر، سەرۆکى شارەوانیى سلێمانى بە کەناڵ8ـى رایگەیاند، بەشێوەى تیروپشکى ئەلیکترۆنى قۆناغى دووەمى دابەشکردنى زەوى رادەگەیەنن و 20 هەزار پارچە زەوى بەسەر فەرمانبەرانى سەرجەم فەرمانگەکان و خانەنشینان دابەشدەکرێت.

گوتیشى، "ئەگەرچى بڕیارێکى پێشتر هەیە زەویى روکن و نایاب دابەشنەکرێت، بەڵام لە سلێمانى بڕیاردراوە زەوى روکنیش دابەشبکرێت".

لەیلا عومەر، ئاماژەى بۆئەوەشکرد، لە سلێمانى نزیکەى 70 هەزار فەرمانبەر و خانەنشین ناویان بۆ وەرگرتنى زەوى پەسەندکراوە و بۆ قۆناغەکانى داهاتوو لە رۆژهەڵات و رۆژئاواى سلێمانى زەوى ئیفراز دەکرێت.

لەیلا عومەر: پێدانى زەوى بەرامبەر پرۆژە بە وەبەرهێنەران سەرکەوتوو بوو

هاوکات لەیلا عومەر، رایگەیاند، پلانى پێدانى زەوى بەرامبەر دروستکردنى پرۆژە بۆ سلێمانى سەرکەوتوو بووە و دەڵێت، بە بەهاى 100 ملیار دینار لەو رێگەیەوە پرۆژە بۆ سلێمانى دروستکراوە.

گوتیىشی، "ئێستا بە بەهاى 50 ملیار دینار پرۆژەى پرد و رێگەوبان و چەند پرۆژەیەکى دیکە تەواوبوون و بە بەهاى 50 ملیار دینارى دیکە، پرۆژە لەقۆناغى پەسەندکردن و قۆناغى جێبەجێکردندان".

لەیلا عومەر: بە هەشت شەقام سلێمانى بە شاڕێى بابان (شەقامی 100 مەتری) دەبەسترێتەوە

سەرۆکى شارەوانیى سلێمانى راشیگەیاند، کارەکانى شەقامى 100 مەتریى سلێمانى بەخێرایی بەڕێوەدەچن و ئەمساڵ سایدێکى شەقامەکە بەڕووى هاتوچۆدا دەکرێتەوە و ساڵى داهاتوو پرۆژەکە تەواو دەکرێت.

گوتیىشی، "سلێمانى بە هەشت شەقام بە شاڕێى بابان دەبەسترێتەوە و سێ لەو شەقامانە دەست بە جێبەجێکردنیان دەکرێت و رەزامەندیى ئەنجوومەنى وەزیرانى بۆ وەرگیراوە و سوودێکى زۆرى بۆ هاونیشتمانییان دەبێت و لە ئایندەیەکى نزیک دەدرێتە کۆمپانیا بۆ جێبەجێکردنى".