سەرەڕای بارودۆخی ناهەمواری مرۆیی و کەرتی غەززە، سوپای ئیسرائیل بەردەوامە لە بۆردوومان و پێشڕەویکردنی لە شاری غەززە، لە دوایین پێشهاتدا هۆشدارییەکی ئاڕاستەی دانیشتووانی تاوەری روئیا و خێوەتگەکانی دەوروبەری کردووە، ناوچەکە چۆڵبکەن بەمەبەستی هێرشکردنە سەری.

سوپای ئیسرائیل لەبارەی هۆکاری هێرشکردنە سەر تاوەرەکە و دەوروبەری، رایگەیاندووە، ئەو ناوچەیە ژێرخانی سەربازیی چەکدارانی حەماسی لێیە و دەیانەوێت لەناوی ببەن.

نەتەنیاهوو: ناوچەیەکی مرۆیی دیکەمان بۆ هاوڵاتییان دروستکردووە

هەر لەو چوارچێوەیەدا بنیامین نەتانیاهوو، سەرۆکوەزیرانی ئیسرائیلیش رایگەیاند، هێرشەکانیان چڕتر دەکەنەوە و ناوچەیەکی مرۆیی دیکەیان بۆ هاوڵاتییانی سڤیل دروستکردووە کە سەلامەتە و هاوکاریی مرۆییشی تێدا دابەشدەکرێت.

نەتانیاهوو، دەڵێت، تاوەکو ئێستا 100 هەزار کەس غەززەیان بەجێهێشتووە و کارئاسانی بۆ رۆیشتنی خەڵکی دیکە دەکەن.

بۆ جەختکردنەوە لە بەردەوامی هێرشەکان سەرۆکوەزیرانی ئیسرائیل گوتی " ژێرخانی سەربازیی تیرۆرستان تێکدەشکێنین، تاوەرەکانی تیرۆر و تۆقاندن لەناو شاری غەززە وێران دەکەین. ناوچەیەکی مرۆیی نوێمان دروستکردووە بۆ ئەوەی هاوڵاتییانی سڤیل رووی لێبکەن، ئەوێ ناوچەیەکی سەلامەتە و دەتوانن هاوکاریی مرۆییش وەرگرن. تاوەکو ئێستا 100 هەزار هاوڵاتی غەززەیان چۆڵکردووە."

هاوکات، سوپای ئیسرائیل هێرشیکردووەتە سەر چەند ناوچەیەکی کەرتی غەززە و بەهۆیەوە تاوەکو ئێستا لانیکەم 31 کەس کوژراون کە 29 یان لە باکووری غەززە بوون.

رۆژی هەینیی رابردوو، حەماس تۆماری ڤیدیۆیی دوو بارمتەی ئیسرائیلی بڵاوکردەوە، کە یەکێکیان لەناو ئۆتۆمبێلێکدایە و باڵەخانە رووخاوەکانی غەززە دەردەکەون و داوا لە بنیامین نەتانیاهوو، سەرۆکوەزیرانی ئیسرائیل دەکات جەنگ رابگرێت و هێرشنەکاتە سەر غەززە، بەوهۆیەشەوە، سوپای ئیسرائیل داوای چۆڵکردنی تەواوی تاوەر و بینا بەرزەکانی شارەکەی کرد و رایگەیاند، ئۆپراسیۆنەکەیان بۆ کۆنترۆڵکردنی شاری غەززە فراوانتر دەکەن.

"