حکومەتى پۆڵەندا رایگەیاند، ئەنجوومەنی ئاسایشی سەر بە نەتەوەیەکگرتووەکان، لەبارەی پێشێلکارییەکانی رووسیا بەرامبەر ئاسایشی ئاسمانیی وڵاتەکەیان کۆدەبێتەوە.

کۆبوونەوەکە لەسەر بەزاندنی ئاسمانیی پۆڵەندایە

رادۆسلۆ سیکۆرسکی، وەزیری دەرەوە و جێگری سەرۆکوەزیرانی پۆڵەندا، رایگەیاند، ئەمڕۆ پێنجشەممە، ئەنجوومەنی ئاسایشی سەر بە نەتەوەیەکگرتووەکان لەبارەی پێشێلکارییەکانی دوێنێی رووسیا بەرانبەر ئاسمانیی وڵاتەکەیان کۆدەبێتەوە و ئامانج لەو کۆبوونەوەیەش ڕاکێشانی سەرنجی هەموو دونیایە بۆ ئەو پێشهاتە نوێیەی لەلایەن رووسیاوە شەوی سێشەممە ئەنجامدرا.

وەزیری دەرەوەی پۆڵەندا، گوتیشی، هەفتەی رابردوو قسەی لەگەڵ ئەنجوومەنی ئاسایشی کردووە و دەبێت ئەو پێشێلکارییە هەڵوێستەی لەسەر بکرێت.

ئاماژەی بۆ ئەوەشکرد، رووسیا شەوی سێشەممە 19 پێشێلکاریی بەرانبەر ئاسمانیی وڵاتەکەیان کردووە دەیان درۆن لە ئاسمانیی وڵاتەکەیان بینراون کە هەندێکیان خراونەتە خوارەوە و تەواوی پڕۆسەی پێشێلکارییەکەی رووسیا حەوت کاتژمێری خایاندووە.

وەزیری دەرەوەی پۆڵەندا، بەتوندی ئەو دەنگۆیانەشی رەتکردەوە کە باس لەوەدەکەن درۆنەکان ئۆکرانی بوون و رایگەیاند، "ئەو دەنگۆیانە بەشێکن لە چەواشەکارییەکانی رووسیا".