ئەپێکی نوێی سۆنی کۆنترۆڵی زیاتر بە دایک و باوک دەدات
کۆمپانیای سۆنی، ئەپڵیکەیشنێکی تایبەتی بۆ ئامێرەکانی پلەیستەیشن راگەیاند کە کۆنترۆڵی زیاتر بە دایکان و باوکان دەدات، لەبارەی کات و جۆری ئەو یارییانەی منداڵەکانیان رۆژانە ئەنجامیدەدەن.
ئەپڵیکەیشنەکە ناوی "PlayStation Family"ـیە، ژمارەیەک ئامرازی تێدایە کە رێگە بە دایکان و باوکان دەدات، چالاکیی منداڵەکانیان لەسەر ئامێرەکانی پلەیستەیشن بەڕێوەببەن، ئەپەکە بۆ هەردوو سیستمی ئای ئۆ ئێس و ئەندرۆید بەردەستدەبێت.
دایکان و باوکان دەتوانن ئاگاداری چالاکی رۆژانەی منداڵەکانیان بن، هەروەها ئەو یارییانەی کە دەیکەن و کاتی تەرخانکراویان بۆ یاریکردن.
کۆمپانیای سۆنی لەمێژە ئامرازەکانی کۆنترۆڵی دایک و باوک پێشکەش دەکات، بەڵام ئەمجارە بە چەند ئامرازێکی نوێوە، لە ئەپڵیکەیشنێکدا کۆیکردوونەتەوە.
دایکان و باوکان بەشێوەیەکی راستەوخۆ دەتوانن بزانن منداڵەکانیان چ یارییەک دەکەن، هەروەها ئەگەر داوای کاتی زیادە بکەن بۆ یاریکردن، دەتوانن لەرێگەی ئەپڵیکەیشنەکەوە پەسەندی بکەن یاخود رەتی بکەنەوە.
راپۆرتی رۆژانە و هەفتانەی ئەپەکە، رێگە بە دایکان و باوکان دەدات بزانن، منداڵەکانیان چەند کاتیان لە یاریکردندا بەسەربردووە و کام یارییەیان زۆرترین جار کردووە.
خستنەبازاڕی ئەم ئەپڵیکەیشنە لەلایەن سۆنییەوە لەکاتێکدایە، چاودێران داوای پاراستنی سەلامەتیی منداڵان دەکەن، لەناو جیهانی یارییە ئەلیکترۆنییەکاندا.
14/09/2025