جەنگیز چاندار، پەرلەمانتاری پارتی دەم لە بازنەی دیاربەکر، لە زیندانی ئەدیرنە، سەردانی هەریەک لە سەڵاحەدین دەمیرتاش، هاوسەرۆکی پێشووتری هەدەپە و سەلچوک مزراکلی، هاوسەرۆکی پێشووتری شارەوانیی دیاربەکری کرد و رایگەیاند، زیندانیکردنی دەمیرتاش و مزراکلی قبوڵنەکراوە و ئەگەر دەخوازرێت ئەو پرۆسەیەی لە ئارادایە بگاتە ئاشتی، پێویستە هەردووکیان ئازادبکرێن.

جەنگیز چاندار: پێویستە تورکیا دژی بڕیاری دادگای مافی مرۆڤی ئەوروپا نەبێت

دادگای مافی مرۆڤی ئەوروپا لە هەشتی تەمموزی 2025 جەختی لە بڕیارەکەی لەبارەی ئازادکردنی دەمیرتاش کردەوە و ماوەیەکی سێ مانگیی بۆ تورکیا دیاریکرد بۆ تانەلێدان.

چاندار لەو بارەیەوە دەڵێت، پێویستە تورکیا ناڕەزایەتیی دژی بڕیارەکە دەرنەبڕێت و ئەو کاتەش دەمیرتاش ئازاد ببێت.

جەنگیز چاندار: ئەم پرۆسەیە بەبێ ئازادیی دەمیرتاش ناگاتە ئاشتی

چاندار کە لە پرۆسەی یەکەمی ئاشتی لەگەڵ مام جەلال و تورگوت ئۆزاڵ، سەرۆککۆماری پێشووتری تورکیا رۆڵی گەورەی گێڕا، دەڵێت، ئەگەر دەخوازرێت ئەو پرۆسەیەی لەئارادایە بەئەنجام بگات، پێویستە خەڵک متمانە و باوەڕی بە پرۆسەکە هەبێت، بەڵام هێشتنەوەی دەمیرتاش و مزراکلی لە زیندان، دەریدەخات پرۆسەکە بەرەو ئاشتی ناڕوات.

چاندار روو لە دەسەڵات دەکات و دەڵێت، "ئەگەر ئێوە دەمیرتاش لە زینداندا بهێڵنەوە و بە بێماناترین بیانوو سکاڵای مزراکلی رەتبکەنەوە، ناتوانن هیچ دڵنیاییەک سەبارەت بە پرۆسەکە لەناو خەڵکدا دروستبکەن، ئەو کاتە پرۆسەکە بە شەلەشەل دەڕوات، نەک رێکوپێک و بە دروستی."

چاندار کە ئەزموونی زۆری لە بواری ئاشتیدا هەیە، لە کۆتایی قسەکانیدا بانگەواز ئاڕاستەی دەسەڵات، "خاوەن ویژدانەکان" و ئەندامانی لیژنەی هاودەنگیی نیشتمانی، برایەتی و دیموکراسیی دەکات و دەڵێت، "پێویستە دەستبەجێ دەمیرتاش و مزراکلی ئازادبکرێن."