بەڕێوەبەرایەتیی گشتی ئۆپەراسیۆنەکانی دەزگای ئاسایشی هەرێمی کوردستان رایگەیاند، لە سنووری پارێزگاکانی کەرکوک و سلێمانی "سێ تیرۆریستیان" دەستگیرکردووە و بە هەماهەنگیی هێزەکانی کۆماندۆی کوردستان و هاوپەیمانان کێوماڵی ناوچەی شوانیان کردووە.

"دەستگیرکردنی تیرۆریستان" لە کەرکوک و سلێمانی

بەڕێوەبەرایەتییەکە لە راگەیەندراوێکدا بڵاویکردەوە، بە هەماهەنگی بەڕێوەبەرایەتی هەواڵگری و دژەتیرۆری کەرکوکی سەر بە وەزارەتی ناوخۆی عێراق توانیویانە لە سنووری کەرکوک "تیرۆریستێک" دەستگیربکەن.

بەگوێرەی راگەیاندراوەکە، دوای ئەنجامدانی لێکۆڵینەوە و "دانپێدانانی ئەو تیرۆریستە" دەستگیرکراوە و لەسەر بنەمای زانیاری هەواڵگری ورد، توانراوە شوێنی "دوو تیرۆریستی دیکە" لە سنووری پارێزگای سلێمانی دەستنیشان بکرێت و بە هەماهەنگی هێزەکانی کۆماندۆی کوردستان دەستگیریان بکەن.

لە راگەیاندراوەکەدا باسی ئەوەشکراوە، "ئەو دوو تیرۆریستەی سنووری پارێزگای سلێمانی" لە ماوەی رابردوو چەکداری داعش بوون و لە ئێستاشدا کاری رێکخراوەییان بۆ کردووە و لە تۆڕە کۆمەڵایەتییەکان بیری توندڕەویان بڵاوکردووەتەوە. "هەرسێ تیرۆریستەکەش" بەگوێرەی ماددەی 2ی تیرۆر راگیراون و لێکۆڵینەوە لە دۆسیەکانیان بەردەوامە.

کێوماڵکردنی ناوچەی شوان و لەناوبردنی حەشارگەکان

بەڕێوەبەرایەتی گشتی ئۆپەراسیۆنەکانی ئاسایش ئاماژەی بەوەشکردووە، بە هەماهەنگی هێزەکانی کۆماندۆی کوردستان و هاوپەیمانان (هێزی تایبەتی ئەمریکا)، لە سنووری ناوچەی شوان کێوماڵێکی بەرفراوانیان ئەنجامداوە و چەندین شوێن و "حەشارگەی تیرۆرستانیان" لەناوبردووە.