زانکۆی ئۆکسفۆرد رایگەیاند، بووەتە یەکەم دامەزراوەی بەریتانیا کە دەستڕاگەیشتن بە وەشانی پەروەردەی ئامرازی ژیریی دەستکردی چات جی پی تی "ChatGPT" پێشکەش بە هەموو خوێندکار و ستافەکانی بکات.

وەشانی چات جی پی تی بۆ خوێندن "ChatGPT Edu"، بە تایبەتی بۆ بەکارهێنانی پەروەردەیی و خوێندن لەلایەن ئۆپن ئەی ئای پەرەی پێدراوە، دوای تاقیکردنەوەیەکی سەرکەوتوو لە ماوەی ساڵی رابردوودا، بە شێوەیەکی بەرفراوان دەخرێتە بەردەستی خوێندکارانی ئۆکسفۆرد.

پڕۆفیسۆر ئان ترێفێسن، جێگری سەرۆکی زانکۆکە بۆ دیجیتاڵ وتی :"هەموو خوێندکارەکانمان دەستیان بە وەشانی چات جی پی بۆ خوێندن دەگات، بۆ دەوڵەمەندکردنی شێوازی فێربوونیان، ئەمەش دەرفەتی نوێ بۆ گەڕان و دروستکردن دەهێنێتە ئاراوە".

شانبەشانی بەردەستخستنی ژیرییە دەستکردەکە، ژمارەیەک راهێنان لەسەر چۆنیەتی بەکارهێنانی ئامرازەکە دەدرێت بە خوێندکارەکان و ستافی زانکۆکە.