خانمە ئەکتەرێکی دروستکراو بە ژیریی دەستکرد، ناوەندە هونەرییەکانی بواری بەرهەمهێنانی سینەمای نیگەران کردووە و بە هەڵکشانێکی مەترسیدار و تۆقێنەر ناوی دەبەن.

ناوی تیڵی نۆروودە

تیڵی نۆروود، خانمە ئەکتەرێکی نوێیە، سەرنجڕاکێشە و هەمووان باسی دەکەن، جیاوازیی ئەم ئەکتەرە لەوەدایە، مرۆڤی راستەقینە نییە و بە ژیریی دەستکرد دروستکراوە.

لە زیورخ ناسێنرا

نۆروود، لەمیانی بەڕێوەچوونی فێستیڤاڵی فیلمی زیورخ لە سویسرا خرایە روو، لەلایەن ستۆدیۆی "Particle6" بەرهەمهێنراوە، سەرنجی زۆرینەی بەشداربووانی راکێشا و بۆچوونەکان لەسەری جیاواز بوون.

سەندیکاکان سەرکۆنەی دەکەن

چەند سەندیکایەکی گەورەی ئەمریکی، لەوانە ساگ ئافترا و ئیکویتی، هەر زوو سەرکۆنەی ئەم دەرکەوتنەیان کرد، جەختیان لەوە کردەوە؛ دروستکردنی ئەکتەر لەڕێگەی ژیریی دەستکردەوە، بەبێ وەرگرتنی مۆڵەت بووە و مەترسیدارە.

مەترسییە بۆسەر پیشەکان

ئەمەش لەکاتێکدایە، لە سەرەتای ساڵی رابردووەوە، هونەرمەندانی ئەمریکا جەخت لە سنووردارکردنی توانای ژیریی دەستکرد دەکەنەوە لە بەرهەمهێنانی تەلەڤیزیۆنیی و سینەماییدا، ترسەکەیان بۆ بەهێزبوونی توانای ژیریی دەستکردە، کە راستەوخۆ ببێت بە جێگرەوەی ئەکتەرە راستەقینەکان و قەیرانی بێکاریی لە کەرتی سینەمای جیهانییدا بێنێتە ئاراوە.