دەستپێکردنەوەی هەناردەی نەوتی هەرێمی کوردستان، دەرگای جارێکی دیکە بەسەر پرسی دەرچوواندنی یاسای نەوت و گاز کردەوە، بەڵام دوای 20 ساڵ لە ناکۆکیی سیاسی، هێشتا چارەنووسی ئەم یاسا گرنگە نادیارە و سەرکردە باڵاکان جەخت لە پێویستیی دەرچوواندنی دەکەنەوە.

سەرۆککۆمار: رێککەوتن پێویستی بە یاسایە

عەبدول لەتیف رەشید، سەرۆککۆماری عێراق، رێککەوتنی ئەم دواییەی نێوان هەولێر و بەغدادی بە هەنگاوێکی گرنگ و ئەرێنی بۆ بونیادنانی متمانە ناوبرد، بەڵام جەختی کردەوە کە پێویستی بە بنەمایەکی یاسایی هەمیشەیی هەیە.

سەرۆککۆمار رایگەیاند:

• رێککەوتنی بەغداد و هەولێر هەنگاوێکی گرنگە.

• رێککەوتنەکە پێویستی بە چەسپاندنی یاسایی هەمیشەیی هەیە.

• یاسای نەوت و گاز گەرەنتیی پەیوەندییەکی سەقامگیر و بەردەوامە.

یەکێتی: چارەسەر لە دەستوور و یاسادایە

لەلایەن خۆیەوە، بافڵ جەلال تاڵەبانی، سەرۆکی یەکێتیی نیشتمانیی کوردستان، لە وتارێکدا جێبەجێکردنی تەواوەتیی دەستووری بە "تاکە چارەسەری کێشەکان" ناوبرد. هاوکات قوباد تاڵەبانی، جێگری سەرۆکوەزیرانی هەرێم، هۆشداریدا لەوەی کە رێککەوتنی ئێستای هەناردەکردنەوەی نەوت جێگیر نییە و نەبوونی یاسای نەوت و گازی بە "کارەسات" وەسفکرد.

مێژوویەکی درێژ لە چاوەڕوانی

ماوەی 20 ساڵە ناکۆکییە سیاسییەکان رێگرن لە دەرچوواندنی یاسای نەوت و گاز، ئەمەش سەرپێچییەکی ئاشکرای ماددەی 112ی دەستوورە کە حکومەتی فیدراڵی و هەرێمەکان پابەند دەکات بە رێکخستنی ئەم کەرتە لە رێگەی یاسایەکی تایبەتەوە. لە ساڵی 2006ەوە تا ئێستا، چوار رەشنووسی جیاواز بۆ یاساکە ئامادەکراون، بەڵام هیچ کامیان بەهۆی رێکنەکەوتنی لایەنەکانەوە نەگەیشتوونەتە پەرلەمان.

چارەنووسەکەی دەکەوێتە خولی داهاتوو

لەکاتێکدا تەمەنی ئەم خولەی ئەنجوومەنی نوێنەرانی عێراق بەرەو کۆتایی دەچێت، دیارە کە هاوشێوەی خولەکانی پێشوو، ناتوانێت ئەم گرێ کوێرەیە بکاتەوە. ئێستا هەموو چاوەکان لەسەر خولی داهاتووی پەرلەمانە، کە ئایا دەتوانێت کۆتایی بەم چاوەڕوانییە 20 ساڵییە بهێنێت و کێشەی نەوت لەنێوان هەولێر و بەغداد یەکلا بکاتەوە.