بە ئامادەبوونی قوباد تاڵەبانی، جێگری سەرۆک وەزیران، گرێبەستی پڕۆژەی هێڵی سێیەمی ئاوی دووکان – سلێمانی واژۆ کرا، کە چارەسەرێکی بنەڕەتی بۆ کێشەی کەمئاوی شارەکە بۆ ماوەی 30 ساڵی داهاتوو دابین دەکات.

وردەکاریی گرێبەستەکە

لە مەراسیمێکدا لە دیوانی وەزارەتی شارەوانی و گەشتوگوزار لە هەولێر، گرێبەستەکە لەلایەن ساسان عەونی، وەزیری شارەوانی و گەشتوگوزار و کۆمپانیای جێبەجێکارەوە واژۆ کرا. گوژمەی تەواوی پڕۆژەکە 423 ملیۆن و 890 هەزار دۆلارە.

تایبەتمەندییەکانی پڕۆژەکە

وەزیری شارەوانی و گەشتوگوزار ڕایگەیاند کە پڕۆژەکە لە چەند بەشێکی گرنگ پێکدێت، لەوانە:

وەرگری ئاو لەسەر ڕووباری زێی بچووک.

وێستگەیەکی پاککردنەوەی ئاو بە توانای 480 هەزار مەتر سێجا لە ڕۆژێکدا.

دوو وێستگەی پاڵنانی ئاو.

دوو هێڵی گواستنەوەی ئاو بە درێژیی 112 کیلۆمەتر و تیرەی 1400 میلیمەتر.

هێڵێکی کارەبای سەرەکی (33 کەیڤی).

ساسان عەونی جەختیشی کردەوە کە "کوالێتیی ئاوی بەرهەمهاتوو لە پڕۆژەکەدا لە بەرزترین ئاست و بەگوێرەی ستانداردە جیهانییەکان دەبێت."

چارەسەری کێشەی گەڕەکە نوێیەکان

ئامانج جەلال، گوتەبێژی بەڕێوەبەرایەتیی ئاوی سلێمانی، پێشتر ڕایگەیاندبوو کە بە تەواوبوونی ئەم پڕۆژەیە، کێشەی ئاوی سەرجەم ئەو گەڕەک و پڕۆژە نیشتەجێبوونانە چارەسەر دەبێت کە لەدوای ساڵی 2016ـەوە دروستکراون و تا ئێستا بە نرخی بازرگانی ئاویان کڕیوە.

هاوکات ئاماژەی بەوەش کرد، تاوەکو پڕۆژەکە تەواو دەبێت، کار لەسەر پەرەپێدانی ژێرخانی ئاو دەکەن و لەم قۆناغەدا کێشەی ئاوی بەشێک لە گەڕەکی قولەرەیسی چارەسەر دەکەن.