ڕاوێژکارێکی سەرۆک وەزیرانی عێراق بۆ کاروباری پیشەسازی ئاشکرای دەکات، کەرتی پیشەسازیی عێراق گەشەیەکی بەرچاوی بەخۆیەوە بینیوە و ئێستا بەرهەمی دەیان کۆمپانیای خۆماڵی ڕەوانەی بازاڕەکانی وڵاتانی عەرەبی و ئەوروپی دەکرێت.

75 کۆمپانیا و کارگە چوونەتە بازاڕە جیهانییەکانەوە

حەمودی لامی، ڕاوێژکاری سەرۆکوەزیرانی عێراق بۆ پیشەسازی و گەشەپێدان و کەرتی تایبەت، ڕایگەیاند: "کەرتی پیشەسازی لە عێراق بەرەوپێشچوونی باشی تۆمارکردووە و 75 کۆمپانیا و کارگەی خۆماڵی بەرهەمەکانیان ڕەوانەی دەرەوە کردووە." بە وتەی ناوبراو، ئەم هەنگاوە نیشانەی گەڕانەوەی متمانەیە بە بەرهەمی ناوخۆیی و دروستکراوی عێراقی لە بازاڕە نێودەوڵەتییەکاندا.

21 کۆمپانیا مۆڵەتی فەرمی هەناردەکردنیان وەرگرتووە

بەگوێرەی دوایین ئاماری وەزارەتی بازرگانی عێراق، 21 کۆمپانیای خۆراکیی عێراقی مۆڵەتی فەرمییان بۆ هەناردەکردنی بەرهەمەکانیان وەرگرتووە. ئەم کۆمپانیایانە مانگانە خۆراک بۆ دەیان وڵاتی عەرەبی و ئەوروپی هەناردە دەکەن، لەوانەش وڵاتانی کەنداوی عەرەبی، ئوردن، تورکیا، کوەیت و میسڕ.

پیشەسازییە جۆراوجۆرەکان: 54 کارگە بەرهەمەکانیان دەفرۆشنە دەرەوە

حەمودی لامی، ئاماژەی بەوەشکرد، 54 کارگەی نیشتیمانیی دیکە کە بەرهەمەکانیان بریتییە لە پاتری ئۆتۆمبێل، شیشی سەقف، فەرش، کومبار و بەرهەمی ڕستن و چنین، دەستیان بە هەناردەکردنی بەرهەمەکانیان کردووە.

هۆکاری گەشەسەندن؛ ئاسانکاریی یاسایی و حکومی

ئەم پێشکەوتنە لە کەرتی پیشەسازیدا دەگەڕێتەوە بۆ هەموارکردنەوەی یاسا و ڕێنماییەکان و ئەو ئاسانکارییە یاساییانەی لەم ساڵانەی دواییدا لە لایەن سەرۆکایەتیی وەزیرانەوە بۆ وەبەرهێنەران و خاوەن کارگەکان کراوە، بە ئامانجی هاندانیان بۆ هەناردەکردنی بەرهەمەکانیان.

ئاماری کۆمپانیا تۆمارکراوەکان لە عێراق

ئەوە لەکاتێکدایە، تاوەکو کۆتایی مانگی حوزەیرانی 2025، ژمارەی کۆمپانیا تۆمارکراوەکان لە عێراق گەیشتووەتە 91 هەزار و 789 کۆمپانیا، کە 87 هەزار و 869 یان کۆمپانیای ئاسایین و ئەوانی دیکەش بریتین لە کۆمپانیای تاک خاوەندارێتی، هاوبەش، سنوردار، پشکی هاوبەش، تێکەڵاو و گشتی.