تەیف سامی، وەزیری دارایی عێراق وردەکاریی قەرزە دەرەکییەکانی سەر وڵات ئاشکرا دەکات و جیاوازی لەنێوان قەرزە دانپێدانراو و نەناسێنراوەکان دەکات، هاوکات پلانی وەزارەتەکەشی بۆ ساڵانی داهاتوو دەخاتەڕوو.

قەرزە دانپێدانراوەکان

وەزیری دارایی ڕایدەگەیێنێت، ئەو قەرزە دەرەکییەی کە ماوەتەوە و دانپێدانراوە (بەپێی ڕێککەوتنی یانەی پاریس)، لە سێ ملیار دۆلار تێناپەڕێت و ساڵانە بەشێوەیەکی بەردەوام دەدرێتەوە.

قەرزە کۆنەکان

تەیف سامی ئاماژە بەوە دەکات، باس لە 40 ملیار دۆلار قەرز دەکرێت کە هی پێش ساڵی 2003ـیە، بەڵام ئەم پارەیە لای حکومەتی عێراق "دانپێدانەنراوە".

پلانی کەمکردنەوەی کورتهێنان

وەزارەتی دارایی کار بۆ کەمکردنەوەی خەرجییەکان لە بودجەی ساڵانی داهاتوو دەکات، ئەمەش لەڕێگەی بەرزکردنەوەی داهاتی باج و گومرگ و چالاککردنی داهاتی کارەبا، بۆ ئەوەی فشار لەسەر گەنجینەی گشتی کەم ببێتەوە.

جیاوازیی ئامارەکان

پێشتر عەلی عەلاق، پارێزگاری بانکی ناوەندی ڕایگەیاندبوو، قەرزە دەرەکییەکانی عێراق نزیکەی 55 ملیار دۆلارە؛ بەڵام بەپێی ڕوونكردنەوەکان، بەشێکی زۆری ئەم پارەیە (زیاتر لە 40 ملیار) قەرزی پێش 2003ـیە و دانپێدانەنراوە، تەنیا نزیکەی 3.8 ملیار دۆلاری قەرزی پاکتاوکراوی ئەو سەردەمەیە.