سەرۆکی تۆڕی هەنگەوانانی کوردستان ئاماری بەرهەمی ئەمساڵی ئاشکرا کرد و ڕایگەیاند، هەرچەندە کوالیتییەکەی لەسەر ئاستی جیهان بێوێنەیە، بەڵام بەرهەمەکە بەشی پێداویستیی ناوخۆ ناکات.

چیرۆکە سەرەکییەکە

عارف شێروانی، سەرۆکی تۆڕی هەنگەوانانی کوردستان ڕایگەیاند، بەرهەمى ئەمساڵى هەنگوین گەیشتووەتە 400 تۆن. ئەم بڕەش بەشی پڕکردنەوەی پێداویستییەکانی ناوخۆ ناکات، چونکە هەرێمى کوردستان ساڵانە پێویستى بە 525 تۆن هەنگوین هەیە.

کێشەی هەناردەکردن

بەهۆی ئەوەی بەرهەمی ناوخۆ تەنیا 400 تۆنە و کورتهێنان هەیە، ناتوانرێت بە فەرمی هەنگوین هەناردەی دەرەوە بکرێت، ئەمە لەکاتێکدایە لەسەر ئاستی جیهان خواستێکی زۆر لەسەر هەنگوینی کوردستان هەیە بەهۆی باشییەکەیەوە.

نهێنیی کوالیتییەکەی

سەرۆکی تۆڕی هەنگەوانان هۆکاری باشیی هەنگوینی کوردی بۆ دوو خاڵ دەگەڕێنێتەوە:

شوێنی بەرهەمهێنان: زۆربەى هەرە زۆرى هەنگەوانان هەنگەکانى دەبەنە کوێستانەکان، بۆیە هەنگوینەکە سرووشتی و کوێستانییە.

جۆری هەنگوینەکە: لە جیهاندا "هەنگوینى دڕ" بە پلە یەک دادەنرێت، زۆرینەى هەنگوینى کوردستانیش لەم جۆرە نایابەیە.

سوپایەک لە هەنگەوان

بەگوێرەی ئامارە تۆمارکراوەکان لە تۆڕى هەنگەوانانى کوردستان:

16,000 هەنگەوان بوونیان هەیە.

800,000 پوورە هەنگ لە هەرێمی کوردستان هەن.