ژمارەی گيانلەدەستدان بەهۆی زريان و لافاوەوە لە بەشێک لە وڵاتانی ئاسيا 400 کەسی تێپەڕاند و گەڕان بەدوای دەيان بێسەروشوێنبوودا بەردەوامە.

زریانەکەی سریلانکا؛ 15 هەزار خانوو وێرانبوون

ناوەندی بەڕێوەبردنی کارەساتەکانی سريلانکا ڕايگەياندووە، بەهۆی خراپی کەشوهەواوە و هەرەسی زەوييەوە نزیکەی 15 هەزار خانووی وێران بووە و نزیکەی 44 هەزار کەسیش ئاوارەبوون و چوونەتە پەناگە کاتييەکانەوە.

سامپاس کۆتوێگۆدا بەڕێوەبەری ناوەندی بەڕێوەبردنی کارەساتەکانی سريلانکا ڕايگەياندووە، ئۆپراسیۆنەکانی فریاگوزاری بە بڵاوەپێکردنی هەزاران سەرباز لە سوپا و هێزی دەریایی و هێزی ئاسمانی بەڕێوەدەچن.

123 کەس گیانیان لەدەستداوە

بەڕێوەبەری ناوەندی بەڕێوەبردنی کارەساتەکانی سريلانکا گوتيشی، "123 کەس گيانيان لەدەستداوە و 130 کەسی دیکەش بێسەروشوێنن."

زریانەکە بەرەو هیندستان دەڕوات

لە هەفتەی ڕابردووەوە زريانی دیتوا دوورگەی سريلانکای گرتووەتەوە و ئەمڕۆ کاريگەری زريانەکە لەسەر دوورگەکە لاواز بووە و بەرەو باکوور بەرەو هیندستانی دراوسێی دەڕوات.

زریانەکەی ئیندۆنیزیا؛ 248 گیان لەدەستدان

هاوکات، دەزگای بەڕێوەبردنی کارەساتی نيشتمانی ئيندۆنيزيا ڕايگەياندووە، بەهۆی لافاو و هەرەسی زەوييەوە زیاتر لە 248 کەس گيانیان لەدەستداوە و گەڕان بەدوای 90 کەسی ديکەشدا بەردەوامە، زريانەکە بە زۆری دوورگەی سوماترای لە باکووری وڵاتەکە گرتووەتەوە.

سێ هەزار خێزانیش ئاوارەبوون

دەزگای بەڕێوەبردنی کارەساتی نيشتمانی ئيندۆنيزيا دەشڵێت، "بەهۆی لافاوەکەوە 500 کەس برينداربوون و نزيکەی سێ هەزار خێزانيش ئاوارەبوون".

زریانەکەی تایلەند؛ 162 کەس گیانیان لەدەستداوە

لە تايلەنديش ژمارەی گيان لەدەستدان بەهۆی لافاوەکەی هەفتەی ڕابردووەوە 162 کەسی تێپەڕاند و گەڕان بەدوای بێسەروشوێنبووەکانيشدا بەردەوامە.

لە ڤێتنامیش 90 کەس و لە فلیپینیش 85 کەس گیانیان لەدەستداوە

هەفتەی ڕابردووش لە ڤێتنام زياتر لە 90 کەس و لە سەرەتای ئەم مانگەشدا لە فليپين 85 کەس بەهۆی لافاوەوە گيانيان لەدەستدا.