وەزارەتی گواستنەوە و گەیاندنی عێراق پلانی ساڵی داهاتووی بۆ ڕێکخستنەوەی کەرتی گواستنەوەی تایبەت ئاشکرا دەکات و ڕایدەگەیەنێت، کرێ و شێوازی کارکردنی تاکسی لە سەرانسەری وڵات یەکدەخرێت و سەرجەم تاکسییەکان پێکەوە دەبەسترێنەوە.

بەستنەوەی تاکسییەکان بە ئەپڵیکەیشنێکەوە

مەیسەم سافی، گوتەبێژی وەزارەتی گواستنەوە و گەیاندنی عێراق ڕایگەیاند، تیمەکانیان بە درێژایی ئەمساڵ بەردەوام بوون لە نوێکردنەوەی سیستمەکانی گواستنەوە و ئێستا دەیانەوێت لە ڕێگەی ئەپڵیکەیشنێکی تایبەتەوە سەرجەم تاکسییەکانی عێراق بە یەکەوە ببەستنەوە. ئامانج لەم پڕۆژەیە ڕێکخستنی کارەکانی تاکسییە لەسەر ئاستی وڵات و فراوانکردنی بەرنامەکەیە بۆ سەرجەم پارێزگاکان، تاکو بتوانرێت تۆڕێکی گواستنەوەی مۆدێرن دروست بکرێت کە سوود لە تەکنەلۆژیای زیرەک وەربگرێت و لەگەڵ پێداویستییەکانی هاووڵاتییاندا بگونجێت.

داتابەیسی ناوەندی و مەرجەکانی کارکردن

بەگوێرەی لێدوانەکەی گوتەبێژی وەزارەت، پڕۆژەکە بریتی دەبێت لە تۆمارکردنی سەرجەم تاکسییەکان لە داتابەیسێکی ئەلیکترۆنیی ناوەندیدا، بەجۆرێک ناسنامەی شۆفێرەکان بەتەواوی دیاریکراو دەبێت. هاوکات مەرجی ئەوە دانراوە کە دەبێت ئۆتۆمبێلەکان پشکنینی تەکنیکی ئەنجام بدەن پێش ئەوەی ڕێگەیان پێبدرێت بچنە ناو سیستمەکە و کار بکەن.

دیاریکردنی نرخ و هەماهەنگییەکان

مەیسەم سافی ئاماژەی بەوەش دا کە لە چوارچێوەی پڕۆژەکەدا کرێی تاکسی دیاریکراو دەبێت. بۆ جێبەجێکردنی ئەم بڕیارانەش هەماهەنگی لەگەڵ بەڕێوەبەرایەتیی گشتیی هاتووچۆ و حکومەتە خۆجێییەکان بەردەوامە، تاوەکو بتوانرێت قۆناغ بە قۆناغ سیستمەکە لە سەرانسەری پارێزگاکانی عێراقدا جێبەجێ بکرێت.