بەڕێوەبەرایەتیی هاتووچۆی سلێمانی کردنەوەی قۆناغی یەکەمی شەقامی 100 مەتریی ڕاگەیاند و وردەکاریی ئاراستەکان و ڕێنماییەکان بۆ شۆفێران دەخاتەڕوو.

کرانەوەی شەقامەکە بەڕووی شۆفێراندا

موقەدەم بەهمەن عەبدوڵڵا، گوتەبێژی هاتووچۆی سلێمانی ڕایگەیاند، پڕۆژەکە گرنگییەکی زۆری بۆ شارەکە هەیە و لە ئێستادا شەقامەکە بە هەردوو ئاراستە لە کەرکووکەوە بۆ قەرەداغ و تانجەرۆ و بەپێچەوانەشەوە بەشێوەیەکی ڕاستەوخۆ کراوەتەوە.

ڕێکارەکان بۆ ئاڕاستەی تانجەرۆ و پردی تاسلووجە

سەبارەت بەو ئۆتۆمبێلانەی لە ئاراستەی تانجەرۆوە دێن، گوتەبێژی هاتووچۆ ڕوونیکردەوە، لە کۆتایی شەقامی 100 مەتری بەهۆی کارکردن لە "پردی تاسلووجە"، شۆفێران پێویستە بچنە سەر شەقامی کەرکووک - سلێمانی و دواتر ئاراستەی خۆیان وەربگرن بۆ دەرچوون لە شاری سلێمانی.

کەمبوونەوەی قەرەباڵغی و ڕێگەپێدان بە بارهەڵگر

خاڵێکی گرنگی کردنەوەی ئەم شەقامە ڕێگەپێدانە بە ئۆتۆمبێلە بارهەڵگرەکان؛ لەمەودوا شۆفێرانی بارهەڵگر دەتوانن لەو ئاڕاستانەی دیاریکراون شەقامی 100 مەتری بەکاربهێنن.

ئەم هەنگاوەش دەبێتە هۆی کەمکردنەوەی لۆد و قەرەباڵغی لەسەر شەقامی ڕاپەڕین - سلێمانی و شەقامی بازنەیی مەلیک مەحموود.

هۆشداری: کارکردن تێیدا بەردەوامە

هاتووچۆی سلێمانی داوا لە شۆفێران دەکات بە وریاییەوە شەقامەکە بەکاربهێنن، چونکە هێشتا پڕۆسەی کارکردن لە شەقامەکەدا کۆتایی نەهاتووە و تیمەکان بە شەو و ڕۆژ سەرقاڵی کارکردنن تێیدا.