هەوکردنی میزەڕۆ یەکێکە لە باوترین جۆرەکانی هەوکردن و دەکرێت تووشی هەریەکێک لە بەشە جیاوازەکانی کۆئەندامی میز و میزەڕۆ ببێت، بۆ نموونە گورچیلەکان، بۆریی میز و میزڵدانیش.

زۆرینەی جار ئەم هەوکردنە تووشی میزڵدان و بۆریی میز دەبێت و لە خانمایشدا باوترە، ئەگەر ئەم هەوکردنە بگاتە میزڵدان ئازار و ناڕەحەتی دروستدەکات، ئەگەریش بگاتە گورچیلەکان ئەوا نابێت بە هیچ جۆرێک پشتگوێ بخرێت.

نیشانەکانی هەوکردنی ڕێڕەوی میز ئەمانەن:

• هەستکردن بە سووتانەوە و کزانەوە لەکاتی میزکردندا
• کەسەکە بە بەردەوامی هەست دەکات میزی دێت
• مزیکردنی زووزوو بەڵام بە بڕی کەم
• گۆڕانی رەنگی میز بۆ سوور، پەمەیی و قاوەیی
• ئازاری ناوەڕاستی حەوز

جۆرە جیاوازەکانی هەوکردنی ڕێڕەوی میز

نیشانەکانی هەوکردنی گورچیلەکان:

• ئازاری پشت و کەلەکە
• تای بەرز
• لەرز
• دڵتێکەڵهاتن
• ڕشانەوە

نیشانەکانی هەوکردنی میزڵدان:

• هەستکردن بە فشاری حەوز
• ناڕەحەتیی بەشی خوارەوەی سک
• ئازار لەکاتی میزکردن
• هەبوونی خوێن لە میزدا

نیشانەکانی هەوکردنی بۆریی میز:

• هەستکردن بە کزانەوە لەکاتی میزکردندا
• هەبوونی دەردراو

ئەو هۆکارانە کامانەن کە مەترسیی تووشبوون بەم هەوکردنە زیاددەکەن؟

ئەم هەوکردنە کاتێک روودەدات کە بەکتریا دەچێتە ناو بۆریی میزەوە و لەوێوە دەگاتە ناو میزڵدان.

ئەم هۆکارانە مەترسیی تووشبوون زیاددەکەن:

• ئەو خانمانەی لە تەمەنی بێئومێدی نزیکن یان لەو قۆناغەدان: لەم کاتەدا رێژەی ئیسترۆجین لە خوێندا کەمدەبێرەوە، ئەمەش گۆڕانکاری بەسەر ئەو بەکتریایانەدا دەهێنێت کە لە ناوچەی زێدان
• جەستەی خانمان: خانمان بۆریی میزیان کورتترە بەراورد بە پیاوان، هەربۆیە بەکتریا ئاسانتر و زووتر دەگات بە بۆریی میز
• دەرمانی ڕێگریکردن لە دووگیانی
• کەمخواردنەوەی ئاو و شلەمەنی: خواردنەوەی بڕێکی زۆر لە ئاو و شلەمەنی یارمەتیی شوشتنی میزڵدان دەدات و بەکتریای تێدا ناهێڵێت
• هەندێک گرفتی زگماکی
• گیرانی ڕێڕەوی میز: بەردی گورچیلە یان گەورەبوونی پڕۆستات میز لە میزڵداندا دەهێڵنەوە، ئەمەش مەترسیی تووشبوون بە هەوکردن زیاددەکات
• لاوازیی سیستمی بەرگری: ئەو دەرمانانەی سیستمی بەرگری لاوازدەکەن، نەخۆشیی شەکرە و چەندد نەخۆشییەکی دیکە، وادەکەن جەستە نەتوانێت بە باشی دژی بەکتریا بجەنگێت، ئەمەش مەترسییەکە زیاددەکات
• بەکارهێنانی بۆریی میزی دەستکرد: ئەو کەسانەی بە هەر هۆکارێک ناتوانن خۆیان میز بکەن، پێویستیان بە بۆرییەکی دەستکرد دەبێت بۆ ئەوەی میز لە میزڵدانیانەوە بکاتە دەرەوەی جەستەیان. بەکارهێنانی ئەم بۆرییەش مەترسیی تووشبوون بەم هەوکردنە زیاددەکات.
• ئەو کەسانەی نەشتەرگەریی ڕێڕەوی میزیان کردووە مەترسیی تووشبوونیان زیاترە.

بەم شێوازانە مەترسیی تووشبوونت کەم بکەرەوە

• خواردنەوەی بڕێکی باش لە ئاو و شلەمەنی
• رێگەی رێگریکردن لە دووگیانبوون بگۆڕە
• ڕانەگرتنی میز، گرنگە پاش سێکس میز بکرێت
• لە پاش خۆشوشتن میز بکە
• لە پاش میزکردن خۆت بە باشی وشک بکەرەوە
• پاکوخاوێنیی ناوچەی زێ بپارێزە
• سابوون و بۆنی بەهێز بۆ ناوچەی زێ بەکارمەهێنە
• لەکاتی سووڕی مانگانە زووزوو سانتی بگۆڕە، ئەگەریش منداڵت هەیە زووزوو دایبییەکەی بگۆڕە