بەهۆی لافاوەکەی چەند ڕۆژی ڕابردوو لە سنووری چەمچەماڵ، بازیان، پیرەمەگروون و دەوروبەری، زیانێکی ماددی گەورە بەر هاونیشتمانییان و کەرتی گشتی کەوتووە و هەوڵەکان بۆ قەرەبووکردنەوەیان لەڕێگەی بەغدادەوە دەستیپێکردووە.

هەوڵەکان بۆ قەرەبووکردنەوە

کۆمیسیۆنی فریاگوزاریی چەمچەماڵ، سەرقاڵی کۆکردنەوەی داتای وردە بۆ خەمڵاندنى تەواوی زیانەکان، بەمەبەستی ئەوەی ڕاپۆرتەکە ڕەوانەی بەغداد بکەن. ئامانجیان ئەوەیە بەشێک لەو بودجەى فریاگوزارییە وەربگرن کە بۆ ئەمساڵ تەرخانکراوە و بڕەکەی 150 ملیار دینارە، تاوەکو وەک قەرەبوو بەسەر زیانلێکەوتوواندا دابەش بکرێت.

چەمچەماڵ؛ زۆرترین زیانی بەرکەوتووە

بەگوێرەی ڕاپۆرتی کۆمیسیۆنی فریاگوزاری، قەزای چەمچەماڵ پشکی شێری زیانەکانی بەرکەوتووە، کە تیایدا زیان بە 25 باخچە و چەندین فەرمانگە و دامەزراوەی حکومی کەوتووە و پێنج باخچە بەتەواوی تێکچوون. ئامارەکان بەم شێوەیەن:

1,258 ماڵ.

نزیکەی 500 ئۆتۆمبێل.

456 پڕۆژەی جۆراوجۆر.

116 دوكان و ماركێت.

دۆخی پیرەمەگروون و گەیشتنی هاوکاری

بەكر عەبدولكەریم، بەڕێوەبەرى ناحیەى پیرەمەگروون ئاشکرای کرد، دوو بارهەڵگر کۆمەک و هاوکاری گەیشتووەتە ناحیەکە (یەکیان خۆراک و ناوماڵ، ئەوی دیکە لەلایەن منداڵپارێزی کوردستانەوە تەنیا خۆراک بووە). سەبارەت بە قەبارەی زیانەکان لە پیرەمەگروون:

94 ماڵ زیانیان بەرکەوتووە (خەمڵاندنی زیانەکان بۆ هەر ماڵێک لە 1 بۆ 3 ملیۆن دینارە، هەیانە گەیشتووەتە 15 ملیۆن).

46 دوکان (زیانەکانیان لە 180 هەزارەوە دەستپێدەکات تاوەکو 71 ملیۆن دینار).

10 ئۆتۆمبێل (زیانەکانیان لە نێوان 1 بۆ 18 ملیۆن دینارە).

بازیان؛ زیانی کشتوکاڵی زۆرە

ئیسماعیل ئەحمەد، قایمقامى بازیان ڕایگەیاند، تاوەکو ئێستا هیچ هاوکارییەکى مرۆیی نەگەیشتووەتە بازیان. زیانەکانی ئەم سنوورە زیاتر بەر کەرتی کشتوکاڵ کەوتووە:

200 بۆ 250 خانووى پلاستیکی.

15 بۆ 20 سەر ئاژەڵ مردار بوونەتەوە.

2 ماڵ و 1 ئۆتۆمبێلیش زیانیان بەرکەوتووە.