لە ماوەی دووگیانیدا ئازاری پشت حاڵەتێکی باوە، سەرەکیترین هۆکاری ئەم ئازارەش ئەو گۆڕانکارییە هۆرمۆنییانەن کە بەسەر جەستەی خانماندا دێن لەو ماوەیەدا.

لە بڵاوکراوەیەکدا، د. سارا ئیسماعیل، پزیشکی پسپۆڕی نەخۆشییەکانی ژنان و منداڵبوون، هۆکارەکانی ئەم ئازارە و چارەسەرەکانیشی خستووەتەڕوو.

هۆکارەکانی ئازاری پشتی ماوەی دووگیانی ئەمانەن:

• گۆڕانکارییە هۆرمۆنییەکان کاریگەریی لەسەر جومگەکانی ناوچەی حەوز و بڕبڕەی پشت هەیە، ئەمەش وادەکات بەستەرەکان تا ڕاددەیەک نەرم ببن، بۆ ئەوەی پڕۆسەی منداڵبوون ئاسانتر ببێت.
• بەپێوە وەستانی رۆژانە بۆ ماوەیەکی زۆر
• قەڵەوی و زیادبوونی کێش لەو ماوەیەدا
• ئەو خانمانەی لە پێش دووگیانبوونیش ئازاری پشتیان هەبووە، لەماوەی دووگیانیدا ئەگەری زیاتربوونی ئازارەکە زۆرترە.

چۆن ئەم ئازارە کەم دەکرێتەوە؟

• وەرزشکردن لەژێر چاودێریی کەسانی شارەزای چارەسەری سروشتی
• لەپێکردنی پێڵاوی نەرم و نزم، هەروەها دوورکەوتنەوە لە پێڵاوی بەرز
• پاڵکەوتن لەسەر لای چەپ، چونکە پاڵکەوتن لەسەر پشت ئازارەکە زیاتر دەکات
• پشوودانی پێویست
• لە حاڵەتی پێویست دەتوانیت ڕاوێژ بە پزیشکەکەت بکەیت، بۆئەوەی ئەگەر پێویستت بە دەرمان بوو بۆت بنووسێت.