لیرەی سووری نوێ بڵاوکرایەوە؛ 90 ڕۆژ بۆ گۆڕینی لیرەی کۆن بە نوێ دیاریکراوە
بە ئامادەبوونی ئەحمەد شەرع، سەرۆكی سووریا، لە رێوڕەسمێكدا لە دیمەشق دراوی نوێی سووریا ڕاگەیەندرا، كە تێیدا وێنەی سەركردەكان لابراوە و دوو سفر لە بەهاكەی كەمكراوەتەوە.
دەستپێکی قۆناغێکی نوێ لە سووریا
لەمیانی رێوڕەسمێكدا سەرۆكی سووریا لە وتارێكدا ڕایگەیاند، گۆڕینی دراو ناونیشانە بۆ كۆتاییهاتنی قۆناغی رابردوو و دەستپێكی قۆناغێكی نوێ كە گەلی سووریا خوازیارییەتی.
هێما نیشتمانییەکان لە بری کەسەکان
سەبارەت بە دیزاینی دراوە نوێكە، سەرۆكی سووریا ئاشكرایكرد، شێوەی دراوە نوێیەكە گوزارشتە لە ناسنامەی نیشتمانی و دووركەوتنەوە لە پیرۆزكردنی كەسایەتییەكان، بۆیە پەنایان بۆ هێما نیشتمانییەكان بردووە، چونكە كەسەكان دەڕۆن و دەگۆڕێن.
لە ماوەی 90 ڕۆژدا دراوە کۆنەکە دەگۆڕدرێت
عەبدولقادر حەسریە، پارێزگاری بانكی ناوەندیی سووریا ڕایگەیاند" هاوڵاتیان بۆیان هەیە لە ماوەی 90 ڕۆژدا دراوە کۆنەکانیان بە دراوی نوێ بگۆڕنەوە و 100 لیرەی کۆن بەرامبەر دەبێت بە یەک لیرەی نوێ و لەسەرەتای ساڵی نوێوە، هەموو پارە دانراوەكان لە بانكەكان دەبن بە لیرەی نوێی سووری".
31/12/2025