دوای گەیشتنی گوژمەیەکی نوێ لە شایستە داراییەکان لە بەغداوە، بەڕێوەبەرایەتیی سایلۆکانی سلێمانی ڕایگەیاند کە دەست بە دابەشکردنی پارەی گەنمی جووتیاران دەکرێت و هیچ بەربەستێک لەبەردەم پرۆسەکەدا نەماوە.

دابەشکردن لە بانکی بابان

نەسرین ئەحمەد، بەڕێوەبەری سایلۆکانی سلێمانی لە لێدوانێکدا پشتڕاستی کردەوە کە بڕی 9 ملیار و 700 ملیۆن دینار گەیشتووەتە سەر هەژماری بانکییان. ئەو ڕایگەیاند کە جووتیارانی سنووری پارێزگای سلێمانی دەتوانن سەردانی "بانکی بابان" بکەن بۆ وەرگرتنی چەکی پارەکانیان و هیچ کێشەیەک لە پرۆسەی دابەشکردنەکەدا نەماوە.

هۆکاری دواکەوتنی پارەکە

سەبارەت بە هۆکاری دواکەوتنی دابەشکردنی ئەم گوژمەیە، بەڕێوەبەری سایلۆی سلێمانی ڕوونی کردەوە کە چەکی پارەکە لە 25ی کانوونی یەکەمی ساڵی ڕابردووەوە لە بەغداوە گەیشتووە، بەڵام بەهۆی پشووەکانی سەری ساڵی نوێ و تەواوکردنی ڕێکارە ژمێریارییەکانی بانکەکانەوە، دابەشکردنەکە بۆ ئێستا دواکەوتووە.

زیاتر لە 80 ملیار دینار ماوە

سەرەڕای خەرجکردنی ئەم بڕە پارەیە، هێشتا بەشێکی زۆری شایستە داراییەکانی جووتیاران لەلایەن حکومەتی فیدراڵەوە نەنێردراوە. بەگوێرەی ئامارەکان، تاوەکو ئێستا 81 ملیار دیناری دیکەی پارەی گەنمی جووتیارانی سنووری سلێمانی لەلای بەغدا ماوەتەوە و هێشتا خەرج نەکراوە.