بەهۆی دابەزینی بەرچاوی نرخی نەوت لە بازاڕە جیهانییەکان و دروستبوونی کورتهێنان لە بودجەی عێراقدا، حکومەت پێداچوونەوە بە نرخی خەمڵێنراوی نەوتدا دەکات و ڕاوێژکارێکی سەرۆکوەزیرانیش ژمارە نوێیەکان ئاشکرا دەکات.

پێشبینییەکانی نرخی نەوت بۆ بودجەی نوێ

مەزهەر محەممەد ساڵح، ڕاوێژکاری دارایی سەرۆکوەزیرانی عێراق ڕایگەیاند، بەپشتبەستن بە کۆمەڵێک خەمڵاندن و شیکاریی ئابووری، پێشبینی دەکەن لە بودجەی ساڵی 2026ـدا نرخی یەک بەرمیل نەوت لەنێوان 55 بۆ 62 دۆلاردا جێگیر بکرێت بۆ ئەوەی لەگەڵ دۆخی ئێستای بازاڕەکاندا بگونجێت.

بنەمای دیاریکردنی نرخەکە

بەگوێرەی قسەکانی ڕاوێژکارەکەی سوودانی، دیاریکردنی ئەم نرخە پشت دەبەستێت بە شیکارییەکانی ڕێکخراوی ئۆپێک و خەمڵاندنەکانی چەند دامەزراوەیەکی دارایی و نێودەوڵەتی. ئەو دامەزراوانە ئاماژە بەوە دەکەن کە نرخی نەوتی خاوی برێنت بە تێکڕا لەنێوان 55 بۆ 62 دۆلاردا دەبێت، بەمەش تێکڕای نرخی یەک بەرمیل لە بودجەدا نزیکەی 58 دۆلار و 50 سەنت دەبێت.

کاریگەریی سیاسەتەکانی ترەمپ و دابەزینی نرخ

ئەم گۆڕانکارییە لە کاتێکدایە لە بودجەی سێ ساڵەی (2023، 2024 و 2025)ـدا نرخی بەرمیلێک نەوت بە 70 دۆلار جێگیر کرابوو، بەڵام دۆخەکە گۆڕاوە. هۆکاری سەرەکیی ئەم دابەزینە بۆ ئەوە دەگەڕێتەوە کە لەوکاتەوەی دۆناڵد ترەمپ وەک سەرۆکی ئەمریکا دەسەڵاتی گرتووەتەدەست و دەستی بە هەڵگیرساندنی شەڕی بازرگانی کردووە، گەشەی ئابووری و پیشەسازی خاو بووەتەوە. ئەم سیاسەتانە وایانکردووە لە ساڵی 2025ـدا نرخی یەک بەرمیل نەوتی برێنت دابەزین بۆ 58 دۆلار بەخۆیەوە ببینێت، لەکاتێکدا لە سەرەتای ساڵدا نرخی هەمان جۆر نەوت 82 دۆلار بووە.