لە چاوپێکەوتنێکی تایبەتدا لەگەڵ بەرنامەی "تارگێت"ی کەناڵ8، فەرماندە ڕۆهەڵات عەفرین، کە هاوشانی ژەنەڕاڵ مەزڵووم عەبدی بەشداریی لە دانوستانە چارەنووسسازەکاندا کردووە، ڕایگەیاند کە دانوستانەکانی دیمەشق شکستیان هێناوە بەهۆی ئەوەی حکومەتی سووریا سیاسەتی "لەناوبردن"ی هەڵبژاردووە. هەروەها ئاشکرایکرد کە ڕۆڵی ئەمریکا لە دانوستانەکاندا "نەرێنی" بووە و هێزەکانیان لە بەرامبەر هێرشەکاندا تا دوا هەناسە بەرگری دەکەن.

شکستی دانوستانەکانی دیمەشق: "داوای هەڵوەشاندنەوەی بەڕێوەبەرایەتیی خۆسەریان دەکرد"

فەرماندە ڕۆهەڵات ئاشکرایکرد کە لە کۆبوونەوەیاندا لەگەڵ ئەحمەد شەرع، سەرۆکی سووریا، حکومەتی دیمەشق پێداگر بووە لەسەر هەڵوەشاندنەوەی تەواوی سیستمی بەڕێوەبەرایەتیی خۆسەر لە ڕۆژئاوای کوردستان. هەروەها پێشنیازی هێزەکانی سووریای دیموکرات (هەسەدە) بۆ تێکەڵبوون لەگەڵ سوپای سووریا وەک سێ فیرقە بە تەواوی ڕەتکراوەتەوە و داواکراوە کە شەڕڤانان بە شێوەی تاکەکەسی بچنە ناو سوپاوە. فەرماندە ڕۆهەڵات وتی: "هەڵوێستی حکومەت، هەڵوێستێکی دوور لە یەکێتیی گەلانی سووریا بوو و لەسەر بنەمای لەناوبردن و کوشتن بوو." لە بەرامبەردا، شاندی هەسەدە ئەم داواکارییانەیان ڕەتکردووەتەوە و ڕایانگەیاندووە: "تەسلیمی حکومەت نابین."

ڕۆڵی نەرێنیی ئەمریکا و پشتیوانیی مەسعود بارزانی

سەبارەت بە کۆبوونەوەکەی هەولێر کە بە میوانداریی  مەسعود بارزانی و ئامادەبوونی تۆم باراک، نێردەی تایبەتی ئەمریکا بەڕێوەچوو، فەرماندە ڕۆهەڵات ڕایگەیاند، "پێویستە ئەوە بڵێم ڕۆڵی تۆم باراک ناوبژیوانی بوو، بەڵام هیچ یارمەتییەکی بۆ ئێمە نەبوو." ناوبراو ئاشکرایکرد کە لە کۆبوونەوەکەی دیمەشقیشدا هەڵوێستی ئەمریکا "نەرێنی" بووە و پێداگر بوون لەسەر ئەوەی هەسەدە بە زووترین کات خاڵەکانی ڕێککەوتنەکە جێبەجێ بکات. لە بەرامبەردا، فەرماندە ڕۆهەڵات ستایشی ڕۆڵی بارزانی کرد و وتی: "لەلایەن بەڕێز مەسعود بارزانییەوە هەوڵدان بۆ چارەسەرییەکی ئاشتیانە و پاراستنی یەکڕێزیی کورد لەبەرامبەر هێرشەکاندا نیشاندرا."

دۆخی مەیدانی: شەڕ لە چەندین بەرەدا بەردەوامە و زیندانیانی داعش هەڵاتوون

فەرماندە ڕۆهەڵات پشتڕاستیکردەوە کە شەڕ و پێکدادان لە چەندین ناوچە بە سەختی بەردەوامە، بەتایبەتی لە دەوروبەری حەسەکە، کامپی هۆل، ڕەققە و کۆبانێ، کە هەوڵێک هەیە بۆ دروستکردنی گەمارۆیەکی گەورە لەو ناوچەیە. هاوکات، مەترسییەکی گەورەی ئاشکرا کرد و وتی، بەهۆی ئەوەی ناوی برد بە "بێهەڵوێستیی هێزەکانی هاوپەیمانان،" زیندانیانی داعش لە گرتووخانەکانی شەدادی و ڕەققە هەڵاتوون، کە ئەمەش مەترسییەکی گەورەیە بۆ سەر تەواوی ناوچەکە.

پەیامی کۆتایی: "هێرشەکە بۆ سەر هەموو کوردە و تا دوا هەناسە بەرگری دەکەین"

لە کۆتایی قسەکانیدا، فەرماندە ڕۆهەڵات هۆشداریی دا کە ئەم هێرشە تەنها بۆ سەر ڕۆژئاوا نییە، بەڵکو "هێرشێکە بۆ سەر هەموو کورد." ڕایگەیاند، ئەو چەکدارانەی هێرش دەکەن، هەمان تاکتیکی داعشیان هەیە و پشتیوانیی تەکنیکی لەلایەن تورکیاوە پێدەگات. لە وەڵامی پرسیارێکدا سەبارەت بە بڕیاری کۆتایی هەسەدە، فەرماندە ڕۆهەڵات وتی: "هەڵوێستی ئێمە وەڵامدانەوە و پاراستنی گەلەکەمانە. سیانزە ساڵە نەترساوین و تا کۆتاییش ترسێکمان لە دوژمن نییە. تا هێزی ئێمە هەبێت، گەلی خۆمان و دەستکەوتەکانی دەپارێزین."