وەزارەتی نەوتی عێراق ئەو دەنگۆیانەی ڕەتکردەوە کە باس لە بوونی قەیرانی سووتەمەنی دەکەن. عەبدولساحیب حەسناوی، گوتەبێژی وەزارەتەکە ڕایگەیاند، ڕۆژانە 30 ملیۆن لیتر بەنزین دەخەنە بازاڕەوە و ئەو بڕە پێداویستیی ناوخۆ پڕدەکاتەوە.

توانای کۆگاکردن و بەرزبوونەوەی خواست

توانای کۆگاکانی بەنزین 135 ملیۆن لیترە. بەهۆی ڕۆژانی پشوو و گەشتی هاووڵاتییانەوە، خواست لەسەر بەنزین بۆ 33.5 ملیۆن لیتر لە ڕۆژێکدا بەرزبووەتەوە، بەڵام گوتەبێژی وەزارەت دڵنیایی دەدات کە ئەمە جێگەی نیگەرانی نییە.

زیادکردنی بەرهەم لە پاڵاوگەی بەسرە

لە چەند ڕۆژی داهاتوودا بڕی 4 ملیۆن لیتر بەنزینی ئۆکتان بەرز لە پاڵاوگەی بەسرەوە بۆ بەرهەمی ناوخۆ زیاد دەکرێت. ستافی وەزارەتی نەوت شەو و ڕۆژ کار دەکەن بۆ دابینکردنی بەرهەمە نەوتییەکان و کۆنتڕۆڵکردنی خواست.