کۆمپانیای مێتا لە هەنگاوێکی نوێدا بۆ ڕێکخستنەوەی خزمەتگوزارییەکانی، بڕیاری داوە ئەپڵیکەیشنی سەربەخۆی "مەسنجەر"ـی فەیسبووک دابخات. بەپێی ڕاگەیەندراوەکە، لە مانگی نیسانی 2026ـەوە ئەم ئەپڵیکەیشنە چیتر بەردەست نابێت و بەکارهێنەران بۆ نامەگۆڕینەوە ناچار دەبن پلاتفۆڕمی سەرەکیی فەیسبووک بەکاربهێنن.

چۆنیەتی پاراستنی گفتوگۆکان

بەپێی ڕاپۆرتێکی ماڵپەڕی "تێک کرانچ"، ئەو بەکارهێنەرانەی تەنیا مەسنجەریان بەبێ هەبوونی هەژماری فەیسبووک بەکارهێناوە، دەبێت لە ڕێگەی ئەپڵیکەیشنی مۆبایلەوە درێژە بە گفتوگۆکانیان بدەن. هەروەها بەکارهێنەران دەتوانن مێژووی چاتەکانیان بگەڕێننەوە بە بەکارهێنانی ئەو کۆدە نهێنییەی (PIN) کە لە کاتی دروستکردنی نوسخەی یەدەگ (Backup) بۆ یەکەمجار لە مەسنجەر چونەتەژوورەوە.

ناڕەزایەتی بەکارهێنەران و ستراتیژی مێتا

ئەم بڕیارە ناڕەزایەتی لای ئەو بەکارهێنەرانە دروست کردووە کە پێشتر هەژماری فەیسبووکیان ناچالاک کردووە و نایانەوێت بۆ نامەگۆڕینەوە بگەڕێنەوە سەر پلاتفۆڕمە سەرەکییەکە. ئامانجی مێتا لەم هەنگاوە، کەمکردنەوەی تێچووەکانی بەڕێوەبردن و چاکسازییە لەو سەکۆ جیاوازانەی کە خزمەتگوزاریی هاوشێوە پێشکەش دەکەن.

مێژووی گۆڕانکارییەکانی مەسنجەر

خزمەتگوزاریی نامەگۆڕینەوەی فەیسبووک لە ساڵی 2008 بە ناوی "فەیسبووک چات" دەستی پێکرد و لە ساڵی 2011 بوو بە ئەپڵیکەیشنێکی سەربەخۆ. لە ساڵی 2014ـەوە نامەگۆڕینەوە لە ئەپە سەرەکییەکە لادرا بۆ هاندانی خەڵک لە بەکارهێنانی مەسنجەر، بەڵام لە ساڵی 2023 مێتا پاشگەزبووەوە و دەستی کردەوە بە تێکەڵکردنەوەی مەسنجەر لەگەڵ پلاتفۆڕمی فەیسبووک.