تونجەر باکرهان ڕایدەگەیەنێت، پڕۆسەی ئاشتی لە تورکیا پێویستی بە هەنگاوی بوێرانە و جێبەجێکردنی بڕیارە یاساییەکان هەیە تاوەکو کۆتایی بەو تاڵیی و خوێنڕشتنە بهێنرێت کە ماوەی 50 ساڵە بەردەوامە.

هەڵوێستی دەم پارتی لەسەر ڕاپۆرتی پەرلەمان

ڕۆژی یەکشەممە 22-02-2026، تونجەر باکرهان، هاوسەرۆکی دەم پارتی لە پارێزگای بەدلیس بەشداریی لە بەرنامەی "کۆبوونەوەی ئازادی و ئاشتیی کۆمەڵایەتی" کرد. باکرهان سەبارەت بە ڕاپۆرتی هاوبەشی کۆمیسیۆنی پەرلەمانی تورکیا ڕایگەیاند، ئەم ڕاپۆرتە بەو شێوەیە نییە کە پرسی کوردی تێیدا چارەسەر کرابێت و تەنیا وەک دەسپێکێک تەماشای دەکەن. ئاماژەی بەوەش کرد کە وەک دەم پارتی تێبینییان لەسەر بەشێکی پێشنیازەکان هەبووە و ناڕەزایەتییەکانی خۆیان پێشکەشی لایەنە پەیوەندیدارەکان کردووە.

پێویستیی بەکۆمەڵایەتیکردنی پڕۆسەی ئاشتی

هاوسەرۆکی دەم پارتی ئاماژەی بەوە کرد، ناوچەکە بۆ ماوەی نیو سەدە تاڵیی و خوێنڕشتنی زۆری تێدا بووە، بۆیە کاتی ئەوە هاتووە کۆتایی بە قوربانیدان بهێنرێت. باکرهان جەختی کردەوە کە تورکیا و بەدلیس شایستەی ئاشتین و ئەو 86 ملیۆن کەسەی لە تورکیا دەژین، دەیانەوێت لە کەشێکی ئارام و دیموکراسیدا بژین. ئەرکی پارتەکەشی بۆ قۆناغی داهاتوو بە "بەکۆمەڵایەتیکردنی ئاشتی" و باسکردنی لە ناو هەموو چین و توێژەکاندا وەسف کرد.

جێبەجێکردنی بڕیارە نێودەوڵەتی و ناوخۆییەکان

لە بەشێکی دیکەی گوتارەکەیدا، باکرهان تیشکی خستە سەر پێویستیی جێبەجێکردنی بڕیارەکانی دادگای مافی مرۆڤی ئەوروپا و دادگای دەستووریی تورکیا. داوای لە پەرلەمانی تورکیا کرد کە بوێرانە هەنگاو بنێت بۆ جێبەجێکردنی ئەو بڕیارانە لە زووترین کاتدا. هەروەها جەختی کردەوە کە پێویستە وەزارەتی ناوخۆی تورکیا دەستبەکار بێت بۆ ئەوەی ڕێکارە یاساییەکان وەک خۆیان پەیڕەو بکرێن و زەمینەی ئاشتییەکی ڕاستەقینە بڕەخسێنرێت.