شەپۆلێکی بارانبارین و بەفربارین هەرێمی کوردستان دەگرێتەوە، کەشناسی و شارەزایان پێشبینی دەکەن بارانەکە لە زۆربەی ناوچەکان ببارێت و لە ناوچە شاخاوییە بەرزەکانیش بەفر دەستپێبکات، هاوکات پلەکانی گەرماش بە رێژەی 4 بۆ 7 پلە دادەبەزن و کاریگەریی شەپۆلەکە تاوەکو بەرەبەیانی رۆژی شەممە بەردەوام دەبێت.

کاتی دەستپێکردن و کۆتاییهاتنی شەپۆلەکە

کەشناسی ڕاشیگەیاند شەپۆلەکە لە نیوەڕۆی ئەمڕۆ پێنجشەممەوە دەستیپێکردووە. ئەم بارانبارینە تاوەکو سبەی هەینی بەردەوام دەبێت و پێشبینی دەکرێت لە بەرەبەیانی رۆژی شەممەدا کاریگەرییەکەی کۆتایی بێت.

چۆنیەتی بڵاوبوونەوەی بارانبارین

سەرەتای بارانەکە لە سنووری پارێزگای دهۆک و ئیدارەی زاخۆوە بە نمەباران دەستپێدەکات، پاشان کاریگەرییەکەی فراوان دەبێت بۆ سنووری پارێزگای هەولێر و ئیدارەی سۆران. لە شەودا رێژەی بارین زیاد دەکات و زۆربەی ناوچەکانی دیکەی هەرێمی کوردستان دەگرێتەوە، بۆ سبەی هەینیش بارانەکە بە شێوەی پچڕپچڕ لە زۆربەی ناوچەکان بەردەوام دەبێت.

ناوچەکانی بەفربارین

کەشناسیی هەرێمی کوردستان ئاماژەی بەوە کردووە کە لە ناوچە شاخاوییە سنوورییەکان کەمێک بەفر دەبارێت. هاوکات محەممەد کەمال باس لەوە دەکات ئەو ناوچانەی بەرزییان لە نێوان 1000 بۆ 1200 مەترە لە ئاستی رووی دەریاوە، ئەگەری بەفربارینیان لێدەکرێت.

پێشبینی بڕی بارانبارین بە ملیمەتر

بڕی بارانی پێشبینیکراو بۆ ناوچە جیاوازەکان بەم شێوەیە دەبێت: لە سۆران 20 بۆ 25 ملیمەتر، راپەڕین 17 بۆ 22 ملیمەتر، دهۆک 10 بۆ 15 ملیمەتر، هەولێر 9 بۆ 13 ملیمەتر، کەرکووک 6 بۆ 7 ملیمەتر، سلێمانی 5 بۆ 7 ملیمەتر، هەڵەبجە 2 بۆ 4 ملیمەتر و لە گەرمیان 1 بۆ 4 ملیمەتر باران دەبارێت.

گۆڕانکاری لە پلەکانی گەرما

بۆ سبەی هەینی پلەکانی گەرما بەراورد بە ئەمڕۆ بە شێوەیەکی بەرچاو دادەبەزن. لە ناوچە گشتییەکان پلەی گەرما 4 بۆ 5 پلەی سیلیزی نزم دەبێتەوە، بەڵام لە ناوچە شاخاوییەکاندا دابەزینەکە زیاتر دەبێت و دەگاتە 6 بۆ 7 پلەی سیلیزی.

پلەی گەرمیی پێشبینیکراوی شارەکان بۆ سبەی

پلەی گەرمی لە هەولێر 12، دهۆک 10، سلێمانی 10، زاخۆ 12، هەڵەبجە 13، چەمچەماڵ 12 و گەرمیان 16 پلەی سیلیزی دەبێت. هەروەها لە ناوچە شاخاوییەکان پلەکان نزمترن، بەجۆرێک لە پیرمام 8، سۆران 7 و لە حاجی ئۆمەران 0 پلەی سیلیزی دەبێت.