سەرۆکی ئەمریکا ڕایگەیاند هێرشە سەربازییەکانی بۆ سەر ژێرخانی وزەی ئێران بۆ ماوەی 5 ڕۆژ ڕاگرتووە و دانوستانەکان بۆ گەیشتن بە چارەسەرێکی گشتگیر لەم هەفتەیەدا بەردەوام دەبن.

ئەنجامدانی گفتوگۆی "بەرهەمدار" لەگەڵ تاران

ئەمڕۆ دووشەممە 23ـی ئازاری 2026، دۆناڵد ترەمپ، سەرۆکی ویلایەتە یەکگرتووەکانی ئەمریکا ڕایگەیاند، لە 2 ڕۆژی ڕابردوودا گفتوگۆی زۆر باش و بەرهەمداریان لەگەڵ ئێران هەبووە. ئاماژەی بەوەش کرد کە ئەم هەفتەیە گفتوگۆکان بەردەوام دەبن و دانوستانەکانیان بۆ گەیشتن بە چارەسەرێکی گشتگیر و هەمەلایەنە دەبێت.

ڕاگرتنی کاتیی هێرشە سەربازییەکان

دۆناڵد ترەمپ ئاشکرای کرد، فەرمانی بە وەزارەتی جەنگی وڵاتەکەی داوە کە هەموو هێرشە سەربازییەکان بۆ سەر وێستگەکانی کارەبا و ژێرخانی وزەی ئێران بۆ ماوەی 5 ڕۆژ دوابخات. ئەم بڕیارە دوای ئەوە دێت کە واشنتن و تاران گەیشتوونەتە قۆناغێکی نوێی گفتوگۆ بۆ کۆتاییهێنان بە ئاڵۆزییەکانی ناوچەکە.

پەیامی سەرۆکی ئەمریکا بۆ چارەسەری هەمەلایەنە

لە پەیامێکی فەرمیدا، سەرۆکی ئەمریکا جەختی کردەوە کە گفتوگۆکانیان قووڵ، ورد و بنیاتنەرن و ئامانج لێیان چارەسەرکردنی تەواوی دوژمنایەتییەکانە لە ڕۆژهەڵاتی ناوەڕاست. ترەمپ ئاماژەی بەوەش دا، درێژکردنەوەی ڕاگرتنی هێرشەکان بەندە بە سەرکەوتنی کۆبوونەوە و گفتوگۆ بەردەوامەکانی نێوان هەردوولا لە چەند ڕۆژی داهاتوودا.