لەپاش هەڕەشەکانی سوپای پاسدارانی ئێران بۆ بەئامانجگرتنی زانکۆ ئەمریکییەکان، پارێزگاکانی هەولێر، سلێمانی و دهۆک پشووی گشتییان لە سەرجەم ناوەندەکانی خوێندن ڕاگەیاند.

ڕاگەیاندنی پشوو لە ناوەندەکانی خوێندن

بەهۆی تێکچوونی دۆخی ئەمنی و چڕبوونەوەی هێرشە درۆنییەکان، پارێزگاکانی هەولێر، سلێمانی و دهۆک بڕیاریاندا ئەمڕۆ یەکشەممە 29ـی ئازار بکەنە پشووی فەرمی. پشووەکە سەرجەم ناوەندەکانی خوێندنی حکومی و تایبەت، لە قۆناغی بنەڕەتییەوە تاوەکو زانکۆ و پەیمانگاکان دەگرێتەوە. پارێزگارەکان ئاماژەیان بەوە کردووە کە ئەم بڕیارە بۆ پاراستنی سەلامەتیی گیانی خوێندکاران و مامۆستایان دراوە.

هەڕەشەکانی سوپای پاسداران

سوپای پاسدارانی ئێران لە ڕاگەیێنراوێکدا هۆشداریی دا کە زانکۆ ئەمریکییەکان لە ناوچەی ڕۆژئاوای ئاسیا، کە هەرێمی کوردستانیش دەگرێتەوە، دەبنە ئامانجی ڕەوای هێرشەکانیان. سوپای پاسداران ڕایگەیاندووە کە ئەم هەنگاوە وەک تۆڵەیەک دەبێت بەرامبەر بەئامانجگرتنی زانکۆکانی ناوخۆی ئێران.

هۆشداری بۆ خوێندکاران و کارمەندان

لە ڕاگەیێنراوەکەی سوپای پاسداران داوا لە سەرجەم خوێندکاران، مامۆستایان و کارمەندانی زانکۆ ئەمریکییەکان کراوە کە بە مەودای 1 کیلۆمەتر لە باڵەخانەی زانکۆکان و دەوروبەریان دووربکەونەوە. ئەم هۆشدارییە دانیشتووانی دەوروبەری زانکۆکانیشی گرتووەتەوە بۆ ئەوەی لە کاتی هێرشەکاندا گیانیان پارێزراو بێت.

مەرج و وادەی دیاریکراوی تاران

ئێران مۆڵەتی تاوەکو کاتژمێر 12ـی نیوەڕۆی ڕۆژی دووشەممە بە کاتی تاران بۆ ئەمریکا دیاری کردووە. سوپای پاسداران مەرجی داناوە کە دەبێت واشنتن بە ڕاگەیێنراوێکی فەرمی بۆردوومانکردنی زانکۆکانی ئێران شەرمەزار بکات و ڕێگری لە هێرشەکانی ئیسرائیل بگرێت، بە پێچەوانەوە هێرش دەکەنە سەر زانکۆ ئەمریکییەکانی دیکە لە ناوچەکەدا.