ئاژانسی ڕۆیتەرز ڕایگەیاند، بە دوو درۆن هێرش کراوەتە سەر کێڵگەی نەوتی ڕومێلە لە پارێزگای بەسرە و بەهۆیەوە چەند کارمەندێک بریندار بوون.

وردەکاری هێرشەکە و زیانە گیانییەکان

ئاژانسی هەواڵی ڕۆیتەرز بڵاوی کردەوە، ئەمڕۆ شەممە، 4ـی نیسانی 2026، بە دوو درۆن هێرش کراوەتە سەر کێڵگەی نەوتی رڕومێلە لە پارێزگای بەسرە. بەپێی زانیاریی سەرچاوە ئەمنییەکان، بەهۆی هێرشەکەی سەر ئەو کێڵگە نەوتییە، 3 کەس بریندار بوون، بەڵام تاوەکو ئێستا قەبارەی زیانە ماددییەکان بەتەواوی نەزانراوە.

بەرپرسیارێتی هێرشەکە

تاوەکو ئێستا هیچ گرووپ و لایەنێک بەرپرسیارێتیی خۆی لە ئەنجامدانی ئەو هێرشە ڕانەگەیاندووە. لە ڕابردووشدا چەندین جار دامەزراوە نەوتییەکان و بنکە سەربازییەکان لە عێراق ڕووبەڕووی هێرشی درۆنی و مووشەکی بوونەتەوە، کە ئامانج لێیان دروستکردنی گوشارە لەسەر کۆمپانیا بیانییەکان و تێکدانی سەقامگیریی ناوچەکە.

گرنگیی ئابووری کێڵگەی رومێلە

کێڵگەی نەوتی ڕومێلە دەکەوێتە پارێزگای بەسرە لە باشووری عێراق و بە یەکێک لە گەورەترین کێڵگە نەوتییەکانی جیهان دادەنرێت. ئەم کێڵگەیە بەشێکی زۆری نەوتی هەناردەکراوی عێراق دابین دەکات و کۆمپانیای "BP"ـی بەریتانی و "PetroChina"ـی چینی لەگەڵ کۆمپانیای نەوتی بەسرە سەرپەرشتیی بەرهەمهێنانی نەوتەکەی دەکەن.