حکومەتی عێراق ئامادەکارییەکانی بۆ کردنەوەی دووەم دەروازەی سنووری لەگەڵ سووریا تەواو کردووە، کە مەبەست لێی ئاسانکارییە بۆ هەناردەکردنی نەوت و پەرەپێدانی جووڵەی بازرگانی لە ناوچەکەدا.

کات و شوێنی کردنەوەی دەروازەکە

سامر قاسم داود، سەرۆکى دەستەى گشتیی گومرگ، ڕایگەیاند، هەفتەى داهاتوو دەروازەى ڕەبیعە لە پارێزگاى نەینەوا دەکرێتەوە. ئەم دەروازەیە هاوسنوورە لەگەڵ شارەدێى تلکۆچەرى سەر بە پارێزگاى حەسەکە لە ڕۆژئاواى کوردستان و بڕیارە دەست بە چالاکییە بازرگانییەکانی بکاتەوە.

ئامانجی کردنەوەی دەروازەکە

بەگوێرەی لێدوانی سەرۆکی دەستەی گشتیی گومرگ بۆ ڕۆژنامەی "سەباح"، ئەم دەروازەیە تایبەت دەکرێت بە هەناردەکردنى نەوت و هاوردەکردنى کاڵاکان لە وڵاتی تورکیاوە. ئەم هەنگاوە وەک بەشێک لە پلانی حکومەتە بۆ زیادکردنی دەروازە بازرگانییەکان و ئاسانکاری بۆ گواستنەوەی سووتەمەنی.

سیستمی کارکردن لە ڕەبیعە

سەرۆکى دەستەى گشتیی گومرگ ئاماژەى بەوە کردووە، ژێرخانى پێویست بۆ دەروازەکە ئامادەکراوە و تیمەکەیان لەوێ جێگیر دەکرێن. بۆ خێراکردنى ڕێکارەکان و مسۆگەرکردنی شەفافیەت، سیستمى "ئەسیکۆدا" لە دەروازەکەدا پەیڕەو دەکرێت کە سیستەمێکی ئەلیکترۆنیی پێشکەوتووی گومرگییە.

دووەم دەروازە لە ماوەی یەک مانگ دا

دەروازەى ڕەبیعە دەبێتە دووەم دەروازەى سنووری لە نێوان عێراق و سووریا کە لەم مانگەدا دەکرێتەوە. پێشتر و لە ڕۆژى 2ی ئەم مانگەدا، دەروازەى "وەلید" دواى 11 ساڵ لە داخستنى کرایەوە و دەستبەجێ هەناردەى نەوتى ڕەش لە عێراقەوە بۆ بەندەرى بانیاسى سووریا لەوێوە دەستیپێکرد.