شارەوانیی چەمچەماڵ، پلانی بەکارهێنانی ئەو پارەیە ئاشکرا دەکات، کە لە قەرەبووکردنەوەی زیانلێکەوتووانی لافاوەکە ماوەتەوە و بڕیارە بۆ ڕێگری لە دووبارەبوونەوەی کارەساتەکە خەرج بکرێت.

بەکارهێنانی پارەی ماوەتەوە

عەلی ڕەئووف، سەرۆکی شارەوانیی چەمچەماڵ، ڕایگەیاند، لەو بڕە پارەیەی بۆ قەرەبووکردنەوەی زیانلێکەوتووانی لافاوەکەی چەمچەماڵ کۆکرابووەوە، بڕی 8 ملیار دینار ماوەتەوە. ئاماژەی بەوە کرد، بڕیاردراوە ئەو بڕە پارەیە بۆ ئەنجامدانی چەند پڕۆژەیەک خەرج بکرێت، کە گرنگترینیان دروستکردنی ڕێڕەوی تایبەت بە ئاوی باراناوە بۆ ناوچەکە.

قۆناغەکانی پڕۆژەکە

سەرۆکی شارەوانیی چەمچەماڵ، ئاشکرای کرد، قۆناغی یەکەمی ڕووپێوی کردنی زەوییەکان تەواو بووە، کە تیایدا ڕووپێوی بۆ 25,000 دۆنم زەوی لە چەمچەماڵ، شۆڕش، بانی مەقان و دەوروبەری پۆندەکە لە ڕێگەی فڕۆکەی بێفڕۆکەوان (درۆن) ئەنجامدراوە. بڕیارە لە هەفتەی داهاتووەوە پڕۆژەکە بچێتە قۆناغی دووەم کە تایبەتە بە دیزاینکردن، دوای تەواوبوونی ئەو قۆناغەش دەست بە جێبەجێکردنی پڕۆژەکان دەکرێت.

ئامانجی پلانە نوێیەکە

عەلی ڕەئوف جەختی لەوە کردەوە، پلانەکەیان بەوردی داڕشتووە تاوەکو لە داهاتوودا ڕێگری لە دووبارەبوونەوەی ڕووداوی لافاو و دروستبوونی زیان بگیرێت. خەرجکردنی ئەو پارەیە بۆ پڕۆژەی ستراتیجیی ئاوەڕۆ و ڕێڕەوی ئاو، بەشێکە لە هەوڵەکانی شارەوانی بۆ پاراستنی ناوچەکە لە مەترسییەکانی بارانبارینی بەهێز و کۆکردنەوەی ئاوی لافاو.